Prokuroria Speciale e Kosovës njoftoi të premten se ka ngritur një aktakuzë kundër 53 të dyshuarve për urdhërimin dhe pjesëmarrjen në masakrën e fshatit Mejë në prill të vitit 1999, e cila la të vdekur 377 civilë shqiptarë.
Në njoftim, Prokuroria nuk bëri të ditur identitetin e të dyshuarve të dosjes, e cila është më e madhja që nga përfundimi i luftës në Kosovë në qershor të vitit 1999.
“53 janë të akuzuar për këtë krim, duke përfshirë 16 që mbanin poste të rëndësishme ushtarake dhe policore në Serbi”, thuhet në njoftimin për shtyp.
“Përveç vrasjeve, operacioni përfshinte edhe dëbimin e mijëra civilëve nga ai rajon, djegien e shtëpive të tyre dhe dërgimin e tyre me forcë në Shqipëri. Këto dëbime u bënë përmes keqtrajtimit dhe konfiskimit të dokumenteve personale të atyre që u dëbuan”, shtoi ai.
Forcat serbe sulmuan Mejën dhe fshatin e afërt Korenicë në komunën jugperëndimore të Gjakovës në Kosovë një muaj pas fillimit të bombardimeve të NATO-s ndaj Jugosllavisë, që kishte për qëllim t’i jepte fund fushatës ushtarake të presidentit Sllobodan Millosheviç në Kosovë.
Me intensifikimin e sulmeve ajrore të NATO-s, u intensifikuan edhe operacionet e ushtrisë dhe policisë serbe, si dhe vrasjet dhe dëbimet e shqiptarëve të Kosovës.
Sipas vendimeve të dhëna nga Gjykata Penale Ndërkombëtare për ish-Jugosllavinë, GJPNJ, në rastet kundër zyrtarëve ushtarakë dhe policorë serbë, sulmet ndaj dy fshatrave ishin pjesë e një operacioni ushtarak të quajtur “Reka”, në të cilin Ushtria Jugosllave, policia serbe dhe njësitë paraushtarake vranë të paktën 377 civilë, nga të cilët 36 ishin nën 18 vjeç. Mijëra u dëbuan në Shqipërinë fqinje dhe 13 persona janë ende të listuar si të zhdukur.
Eshtrat e shumë viktimave të masakrës u gjetën 15 vjet më vonë në varre masive në një qendër trajnimi policor në periferi të Beogradit, Batajnicë.
Më herët të premten, prokurorja Drita Hajdari tha për media se aktakuza është e ndarë në tri pjesë.
“Pjesa e parë e aktakuzës përmban emrat e pesë personave që dyshohet se kanë planifikuar masakrën. Pjesa e dytë përmban emrat e 11 personave që zbatuan planin në bashkëpunim me grupin e parë. Grupi i tretë përmban 37 persona të dyshuar si ekzekutues dhe në një farë mënyre kontribuues të masakrës”, tha Hajdari.
Ajo shtoi se të gjithë personat e përfshirë në aktakuzë janë në liri dhe se ndaj tyre është ngritur “urdhër arrest ndërkombëtar” nga gjykata e Prishtinës.
Në vitin 2021, në mungesë të bashkëpunimit ligjor me Serbinë, Kosova ndryshoi legjislacionin e saj për ta bërë më të lehtë gjykimin e të dyshuarve për krime lufte në mungesë të tyre.
