Ratifikimi në Kuvend i marrëveshjes mes qeverisë së Shqipërisë dhe Italisë për një qendër procesimi emigrantësh në Gjadër duhet të pezullohet automatikisht deri në vendimin përfundimtar të Gjykatës Kushtetuese, pas pranimit prej Gjykatës të padisë nga deputetët e opozitës.
Gjykata Kushtetuese njoftoi të mërkurën në një konferencë shtypi urgjente se Mbledhja e Gjyqtarëve pranoi të kalojë për gjykim padinë e 30 deputetëve të opozitës për kontrollin e kushtetutshmërisë së “Protokollit të nënshkruar midis Këshillit të Ministrave të Republikës së Shqipërisë dhe Qeverisë së Republikës Italiane, “Për forcimin e bashkëpunimit në fushën e migracionit”.
Në një konferencë për mediat, kryetarja e Gjykatës Kushtetuese, Holta Zaçaj bëri me dije se ky vendim sjell automatikisht pezullimin e ratifikimit të marrëveshjes, e cila kaloi me përshpejtim komisionet parlamentare vetëm tre ditë më parë dhe do të votohej në parlament të enjten, më 14 dhjetor.
“Bazuar në nenin 52, pika 3, të ligjit nr. 8577/2000, shqyrtimi në seancë i çështjes pezullon automatikisht procedurat e ratifikimit në Kuvend të Protokollit të bashkëpunimit, deri në vendimin përfundimtar të Gjykatës Kushtetuese,” thuhet në njoftimin e Gjykatës Kushtetuese.
E pyetur nga gazetarët nëse vendimi do të zbatohej, Zaçaj tha se nuk do interpretonte situata hipotetike. Ajo tha se Gjykata kishte marrë masat që veç njoftimit publik, Kuvendit t’i jepej në shkrim dorazi vendimi i Mbledhjes së Gjyqtarëve në orën 8 të mëngjesit të enjten.
Marrëveshja mes Ramës dhe Melonit, që lejon ngritjen e një kampi refugjatësh në Gjadër është kritikuar nga organizatat për të drejtat e njeriut. Marrëveshja që u nënshkrua pa transpsrencë po ashtu pretendohet të jetë marrë në shkelje të ligjit.
