Fotinia, një zonjë pensioniste që banon në një nga pallatet buzë detit ka mësuar këto ditë se bashkia e Durrësit ka vendosur ta zgjasë shëtitoren në drejtim të murit perëndimor të portit.
“Tani e kuptoj sepse e gjithë kjo hapësirë është mbushur me gurë – tha Fotinia, duke shtuar se “Shëtitorja bregdetare ka përfunduar para dy vjetësh; përse duhet ta arnojnë përsëri.
Mjaftonte një projekt i plotë me të gjithë elementet kryesore, që nga gjelbërimi, kanalizimet, lodrat e fëmijëve, shkallaret në drejtim të detit, ndriçimi, e kështu me radhë”.
Zonja e moshuar kujton se kur bie shi me rrebesh, sheshet mbushen me ujë, ndërsa kanalet që përfundojnë në det bëhen shkak për erën e rëndë në shëtitore.
Bashkia e Durrësit në buxhetin e këtij viti ka parashikuar financime për disa ndërhyrje ndërtimore në shtitoren bregdetare, dhe po ashtu në institucionet kulturore të qytetit, si teatri “Aleksandër Moisiu” dhe galeria e arteve pamore “Nikolet Vasia”.
Një nismë e mirë për të rritur vlerat e infrastrukturës turistike dhe artistike në dobi të komunitetit në hapësirat në qendrore të Durrësit.
Por në disa nga ndërhyrjet e parashikuara, projektet janë realizuar vetëm 2-3 vjet më parë.
Ende pa kaluar 30 muaj nga dorëzimi i punimeve, bashkia e ka parë të nevojshme të ndërhyjë pjesërisht në fillimin e shëtitores bregdetare, duke e ndërtuar pjesën e mbetur deri në murin perëndimor të portit, si dhe të gjithë zonën prej disa qindra metra nga pista – urë deri në ngrehinën e njohur me emrin “Sfinksi”.
“Besoj se e gjithë zona deri te Sfinksi do ti përngjajë në të ardhmen pjesës së parë të shëtitores, edhe për nga shtrimi me pllaka, edhe për sheshin fundor të saj – për BIRN dr. Artan Kacani.
Ai tha se ky shesh pranë Sfinksit është dëmtuar rëndë nga përplasjet e dallgëve, por mbi të gjitha nga dizajni i gabuar me gurë, të cilat nuk mundën të tregojnë për shumë kohë nga lart shkrimin “I love Durres”.
Dr Kacani vlerëson se numri i madh i lokaleve shumë pranë detit, është një problematikë tjetër për tu zgjidhur në shëtitoren e Durrësit me gjatësi disa km.
“Presioni imobiliar e rrit çdo ditë interesin për shitblerjen e apartamenteve dhe lokaleve në të gjithë zonën – shprehet dr. Artan Kacani.
Pranë konstruksioneve metalike në fund të shëtitores, 2-3 mjeshtra po sistemojnë listelat prej dërrase, që dallgët i shkulin sa herë që fillon dimri.
Faiku nuk e ngre fare kokën nga dyshemeja me listela dhe përpiqet që asgjë të mos i shkojë kot.
Ai ndjehet i gëzuar që në të ardhmen nuk do të merret përsëri me dërrasat e dëmtuara.
“E morra vesh që pllakat do ti zëvëndësojnë dërrasat me pllaka guri.
Nuk ka si bëhet më mirë” – duke u përpjekur të mos e tregojë motivin e tij profesional.
Edhe Fotinia me shoqet e saj e ka mbarur shëtitjen.
Duket se kanë folur për tabelat e munguara me të dhënat e projekteve të ardhshme të bashkisë në shëtitore.
“Edhe një gjë tjetër nuk e kam marrë vesh ende? – pyet ajo.
A do të përfundojë shëtitorja brenda portit të peshkimit, apo thjesht do të përplaset në mur?
Do të më pëlqente që ta blija peshkun në merkaton e peshkut, siç na kanë premtuar – tha Fotinia.
Nuk ka kuptim të jesh në Durrës e ta blesh peshkun në karrocat e rrugës – përfundon ajo.
