Seanca paraprake që u zhvillua të premten më 26 janar në Gjykatën e Posaçme të Shkallës së Parë për shqyrtimin e kërkesës së prokurorisë respektive për kalimin për gjykim të çështjes penale në ngarkim të ish-kryetarit të Bashkisë Durrës, Vangjush Dako, dështoi të përfundonte. Pasi kishin kaluar rreth pesë orë, gjykata njoftoi se seanca është shtyrë për më datë 2 shkurt në orën 09:00, kur pritet që gjykata të shprehet për kërkesat procedurale.
Dako, i cili gjendet në masën arrest me burg që prej muajit qershor, akuzohet për “Shpërdorim detyre” në procedurën e dhënies së lejes së ndërtimit të një pallati shumëkatesh dhe shpërdorim të fondeve publike në procedurën e prokurimit për ndërtimin e një shëtitoreje në bregdet.
Në përfundim të hetimeve paraprake ka rezultuar se Dako ka kryer veprime në kundërshtim me kompetencat e kryetarit të bashkisë në miratimin e lejes së ndërtimit në favor të shoqërisë Fakle sh.p.k, pasi Dako dhe zyrtarët e kësaj bashkie i përpiluan dokumentet dy vjet pasi ndërtimi kishte përfunduar dhe banorët banonin në pallatin në fjalë.
Hetimi i SPAK konkludon se, “është bërë legalizimi i një objekti shumëkatësh, të ndërtuar pa leje, ndërkohë që dhe vetë ndërtimi nuk është bërë sipas projektit të paraqitur nga ndërtuesi dhe të miratuar nga Bashkia Durrës”.
Vepra e dytë penale për të cilën prokuroria kërkon gjykimin e Dakos ka të bëjë me një procedurë prokurimi, për shërbim konsulence, sigurimin e një projekti të quajtur “Projektim zbatim për Promenadën Bregdetare dhe Plazhin publik nga Bërryli deri në Currila”.
Sipas SPAK, komisioni i ngritur me urdhër të Dakos, ka kryer gabim llogaritjet e fondit limit, me një vlerë gati dhjetë herë më shumë se ajo që duhet të llogaritej në bazë të Vendimit të Këshillit të Ministrave.
SPAK njoftoi më 10 dhjetor 2023 përfundimin e hetimeve për Dakos dhe 10 persona të tjerë dhe kalimin e çështjes për gjykim. Megjithëse gjykata ka përcaktuar më parë të paktën dhe dy data të tjera për zhvillimin e seancës paraprake, ato kanë dështuar të zhvillohen. Ndërkohë, edhe seanca e të premtes nuk u arrit të përfundonte.
Pas ndalimit të Dakos më 6 qershor, 2023, avokati i tij mbrojtës, Petrit Ismaili deklaroi për mediet se vendimet për të cilat akuzohet-ish kryebashkiaku i Durrësit janë kolegjiale dhe jo vendimmarrje të tij.
Vangjush Dako është kryebashkiaku më jetëgjatë i Partisë Socialiste në Durrës, i shpallur i padëshirueshëm nga Departamenti Amerikan i Shtetit me motivacionin e “korrupsionit madhor” në korrik 2019. Ai është akuzuar nga opozita dhe ka rezultuar në përgjime me elementë të krimit të organizuar, të cilët veç narkotrafikut dyshohet se ndikuan në tjetërsimin e rezultatit të zgjedhjeve në Durrës në vitin 2017.
Bashkë me Dakon janë dërguar për gjykim një sërë zyrtarësh të bashkisë Durrës dhe administratori i firmës ndërtuese të pallatit shumëkatësh.
