Gjykata e Posaçme e Shkallës së Parë njoftoi të enjten se kishte pranuar kërkesën e SPAK për të konfiskuar pasuritë e Redjan Rrajas, i dënuar me burg të përjetshëm po nga kjo gjykatë për pjesëmarrje në atentatin ndaj prokurorit Arjan Ndoja, ku mbeti i vrarë shoferi i këtij të fundit.
Mes pronave të konfiskuara përfshihen 3 njësi tregtare, dy garazhe dhe automjete luksoze në pronësi të Redjan Rrajës dhe familjarëve të tij. Pronat janë konfiskuar bazuar ligjin “Antimafia”, pasi Rraja u gjet fajtor edhe si anëtarë i një grupi të strukturuar kriminal.
“Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Atalanta Zeqiraj, me vendimin Nr. 1 datë datë 07.02.2024 vendosi: Pranimin e kërkesës së Prokurorisë së Posaçme kundër Korrupsionit dhe Krimit të Organizuar, Tiranë”, thuhet në njoftim.
Rraja u dënua me burg për jetë në korrik të vitit që shkoi si një prej autorëve të atentatit ndaj prokurorit Arjan Ndoja, shoferit të tij Andi Maloku, i cili humbi jetën dhe Landi Muharremit, i njohur edhe me emrin Aleksandër Laho – ngjarje e ndodhur më 1 nëntor të vitit 2019 në mbikalimin e Shkozetit në Durrës. Ariol Halilaj, bashkëpunëtor i Rrajas u dënua me 35 vjet burg. Persona të tjerë të përfshirë janë ende në hetim apo kërkim. Ndoja është shkarkuar nga Komisioni i Pavarur i Kualifikimit dhe është në pritje të vendimit të Kolegjit të Posaçëm të Apelimit.
Pasuritë e konfiskuara ishin sekuestruar në tetor 2021 dhe sipas prokurorisë përfshijnë ndër të tjera dy njësi tregtare, një apartament që shërben si njësi tregtare dhe dy garazhe, që të gjitha të ndodhura në Tiranë. Gjithashtu janë sekuestruar edhe 2 makina luksoze, tip “Audi –A8”, një orë dore tip “Roleks” dhe shuma prej 2750 euro. Gjykata revokoi sekuestron mbi një makinë “Bentley” tipi Continetal të blerë nga Rraja në vitin 2019.
Rraja është i afërm i ish-deputetit të Partisë Socialiste, Rrahman Rraja dhe ka qenë edhe më herët i proceduar penalisht. Ai është denoncuar në një rast publikisht nga ish-oficeri i policisë Emiljano Nuhu se e kishte kërcënuar për të mbyllur hetimet ndaj djalit të deputetit, i akuzuar për dhunimin e të dashurës. Ramaz Rraja, pjesëtar tjetër i familjes është po ashtu i akuzuar si pjesëmarrës në atentati, por procesi gjyqësor ndaj tij është në vijim.