Pesë gjyqtarë të gjykatave të shkallës së parë kanë hequr dorë nga kandidimi për ngritjen në detyrë në Gjykatën e Posaçme dhe në atë të Apelit, ç’ka solli edhe përfundimin e procedurës së ngritjes në detyrë për këto pozicione nga ana e Këshillit të Lartë Gjyqësor, KLGJ.
Në nëntor të vitit 2022, KLGJ shpalli tre pozicione të lira në Gjykatën e Posaçme të Shkallës së Parë për Korrupsionin dhe Krimin e Organizuar dhe tre vende vakante në fushën penale pranë Gjykatës së Apelit të Juridiksionit të Përgjithshëm.
Nëntë vende vakante janë të hapura për fushën penale në Apelin e Posaçëm dhe katër pozicione të tjera për Gjykatën Administrative të Apelit.
Sipas relatimit të anëtarit të KLGJ-së, Klodian Kurushi në mbledhjen e të enjtes më 15 shkurt, disa gjyqtarë janë tërhequr nga kandidimi për pozicionet, por qëndrojnë në garë për vende
Aktualisht kandidojnë 12 gjyqtarë për tre vende vakante në Gjykatën e Posaçme, 16 gjyqtarë për Apelin e Juridiksionit të Përgjithshëm në fushën penale, 22 gjyqtarë për fushën civile në Apelin e Juridiksionit të Përgjithshëm dhe 9 gjyqtarë për katër pozicionet e lira në Gjykatën Administrative të Apelit.
Në mbledhjen e të enjtes, nuk u arrit të shqyrtoheshin kërkesat e Inspektorit të Lartë të Drejtësisë për procedimin disiplinor të gjyqtares Kaçe Agolli, e shkarkuar nga detyra në vitin 2021 prej Komisionit të Pavarur të Kualifikimit, KPK, si dhe ndaj gjyqtares Mimoza Margjeka, kjo e fundit e dënuar me formë të prerë nga Gjykata e Posaçme, për përfshirje në veprime korruptive. Nga sa u relatua në mbledhje u mësua se Agolli gjendej në Bruksel në një vizitë turistike, ndërsa Margjeka kishte sjellë raport se ishte sëmurë.
KLGJ miratoi të enjten dy projektvendime për hapjen e procedurës dhe shpalljen e kërkesës për kandidatura nga radhët e gjyqtarëve për komandimin në pozicionin e ndihmësmagjistratit në Gjykatën e Lartë dhe në Gjykatën Kushtetuese.
