Pasi socialistët votuan në unison ligjin që u hap rrugë ndërtimeve në zonat e mbrojtura, deputeti i Partisë Socialiste, Erion Braçe u përball me aktivistë që protestonin jashtë dyerve të parlamentit dhe që e cilësuan të turpshëm votimin prej tij.
Braçe u kundërpërgjigj me një sulm ndaj aktivistëve mjedisorë përmes një postimi të gjatë në Facebook, duke i cilësuar ata si “hajdutë mjedisorë”.
“Nuk ka shans asnjë nga ju hajdutët mjedisorë, të vendosë emrin tim në krah të një akti ligjor apo antiligjor, grabitës, vjedhës, shpërdorues, dëmtues, përvetësues -mbi të gjitha, në Divjakë apo në çdo cep të vendit”, shkroi Braçe, pak pasi ai dhe kolegët e tij votuan ligjin e kundërshtuar nga organizatat e mbrojtjes së mjedisit dhe Bashkimi Europian.
Pa ofruar asnjë fakt, Braçe i akuzoi ata se kishin përfituar padrejtësisht fonde dhe se nuk kishin bërë asgjë për të mbrojtur parkun “Divjakë-Karavasta”.
“Thënë këtë, tani është koha e nis transparenca – do e bëj unë, për çdo qindarkë kombëtare e ndërkombëtare, deri tek e fundit e marrë në emër të Divjakës,” shkroi Braçe.
Ndryshimet ligjore për zonat e mbrojtura u miratuan të enjten me 74 vota nga deputetët socialistë përmes një procedure të diskutueshme në shmangie të konsultimit publik. Drafti u paraqit fillimisht si një nismë e 12 deputetëve, por u ndryshua thuajse tërësisht në Kuvend pasi qeveria dërgoi variantin e vet që e quajti “dhënie mendimi”.
Ambasadori i Bashkimit Europian në Tiranë, Silvio Gonzato paralajmëroi përmes një letre para votimit mazhorancën se drafti përfundimtar binte ndesh me konventat dhe legjislacionin e BE-së për biodiversitetin dhe kërkoi konsultime publike gjithëpërfshirëse me organizatat mjedisore.
Shumica socialiste bëri një vesh shurdh ndaj këtyre kërkesave dhe kaloi ligjin në kuvend me urgjencë. Ky votim u shoqërua me protestë të aktivistëve të mjedisit. I pyetur nga BIRN se mbi ç’prova i bazonte akuzat ndaj aktivistëve mjedisorë, Braçe nuk u përgjigj deri në publikimin e këtij shkrimi.
