Fredi Beleri, kyetari i zgjedhur i Bashkisë së Himarës në zgjedhjet e 14 majit të vitit të kaluar kërkoi pafajësi të mërkurën më 28 shkurt për akuzën e korrupsionit në zgjedhje përmes avokatit të tij, Geni Gjyzari në Gjykatën e Posaçme.
Në një seancë që zgjati gati 2 orë, Gjyzari u qëndroi gjithë pretendimeve të paraqitura më parë, për paligjshmëri të procedurës së ndjekur në hetimin e kësaj çështje, e për rrjedhojë të paligjshmërisë dhe papërdorshmërisë së provave. Ai e cilësoi të paligjshëm procedimin penal të regjistruar nga Prokuroria e Vlorës, duke evidentuar se nuk ishte kompetencë e saj për kryerjen e hetimeve të tilla, por e SPAK-ut. Po ashtu, konstatoi se përgjimet dhe vëzhgimet e policisë ishin kryer me inciciativë, përpara se të nxirrej një urdhër nga prokuroria. Për prokurorët që kishin hetuar çështjen në Vlorë, u tha se ishin zgjedhur duke shmangur shortin.
Sipas Gjyzarit, dëshmitarët mbi të cilët ishte bazuar hetimi, vëllezërit Arsen dhe Avdul Rama, kishin dhënë disa deklarime kontradiktore apo të rreme. Sipas tij, fakti se dëshmitari Arsen Rama ishte paguar nga policia, përbënte një vepër penale, pasi një bashkëpunëtor i prokurorisë nuk mund të paguhet. Gjyzari shpjegoi se paguhen vetëm informatorët e policisë dhe jo bashkëpunëtorët apo dëshmitarët e prokurorisë. Sipas avokatit, dukej se gjithë veprimet e kryera nga policia dhe prokuroria e Vlorës kishin pasur si qëllim pengimin e Belerit për të fituar zgjedhjet vendore për Bashkinë e Himarës.
Përfaqësuesi i Belerit dhe Kokaveshit u shpreh se gjykata ka cënuar të drejtat e të pandehurve gjatë procesit dhe solli në vëmendje vendime të Gjykatës Evropiane për të Drejtat e Njeriut. Ai tha se duhet që gjykata të konstatojë falsitetin e akteve dhe të mos konsiderohen në marrjen e vendimit.
Në përfundim, Gjyzari tha se për Belerin nuk provohet ekzistenca e faktit penal dhe se nuk ka prova për të vërtetuar se Kokaveshi ka konsumuar vepër penale.
Në vijim, ai parashtroi kërkime edhe në rastin se gjykata do t'i vlerësojë fajtorë të pandehurit, duke kërkuar që për Belerin të mos caktohet masë më e madhe dënimi nga periudha e paraburgimit që ka kryer, ndësa për Kokaveshin të jepet dënim alternativ me detyrimin për kryerjen e punëve publike ose të pezullohet dënimi.
Prokuroria e Posaçme kërkoi më 13 shkurt deklarimin fajtor të Belerit për korrupsion aktiv në zgjedhje dhe dënimin e tij me 2.6 vjet burg. Për të pandehurin Pandeli Kokaveshi, i akuzuar si bashkëpunëtor i Belerit, u kërkua dënimin me 2 vjet heqje lirie dhe pezullimin e masës ndëshkimore për arsye shëndetësore, me kusht që të paraqitet pranë shërbimit të provës për katër vjet.
Në fund të seancës të mërkurën, Fredi Beleri kërkoi të paraqiste dhe ai mbrojtje të përmbledhur, por gjykata vendosi shtyrjen e seancës për më datë 5 mars, në orën 13:00.