Kompania Genti 001 u themelua në vitin 2019 për të kryer aktivitetet ekonomike të tregtisë së materialeve të ndryshme të ndërtimit dhe lavazho ndërsa SPAK vëren brenda një periudhe trevjeçare, arriti të fitojë 32 procedura prokurimi të organizuara nga Bashkia Patos plus shumë të tjera nga institucione të tjera publike. Të dhënat e Agjencisë së Prokurimeve Publike, tregojnë se që në nisje të aktivitetit, shiti mallra dhe shërbime të ndryshme në Bashkinë Patos apo njësi të ndryshme të sektorit publik në Fier, përfshirë shërbimin e lavazhos për mjetet e e ujësjellësit të Patosit. Por ndërsa shumica dërrmuese e këtyre kontratave eci mirë, njëra, ngeci për shkak se një operator i dytë ofroi një çmim prej 1.5 milionë lekësh më të lirë. Procedura e prokurimit, e cila duhej të ndërtonte një segment rrugor të shembur, pritej t'i kushtonte taksapaguesve 6.7 milionë lekë, sipas vlerësimit të bashkisë. Operatori konkurrent dorëzoi një ofertë me vlerë 1.5 milionë lekë më lirë. SPAK thotë se për shkak të konkurrencës, Balilaj ndërmorri përmes punonjësve të bashkisë disa procedura që synuan anulimin e procedurës së prokurimit.
“Rezulton se ish Kryetarja e Bashkisë Patos, R. B. dhe anëtarët e KVO-së A. P. (ish Nënkryetare e Bashkisë Patos), Sh. B. dhe E. R., në bashkëpunim mes tyre, kanë konsumuar elementët e veprës penale “Shkelja e barazisë së pjesëmarrësve në tendera apo ankande publike”, parashikuar nga nenet 258 (para ndryshimeve me ligjin nr. 43/2021 ), e 25 të Kodit Penal, duke favorizuar në kundërshtim me ligjin, dhe shpallur fitues operatorin ekonomik “G……. 001”, në procedurën e prokurimit “Ndërtim emergjent i murit mbajtës me gabiona dhe gurë në Dukas-Breg, si pasojë e rrëshqitjes së tokës dhe kthimin e rrugës në gjendjen e mëparshme”, me numër REF-89301-03-08-2021. Nga dokumentacioni i dorëzuar nga ofertuesit, e parë kjo në raport me kriteret e vendosura në Dokumentet Standarte të Tenderit, duhej të ishte shpallur fitues operatori ekonomik “2…”, i cili përveçse përmbushte kushtet, kishte dhe ofertë në vlerën 1,5 milion lekë më të vogël se operatori “G….. 001”,” thotë SPAK.
Balilaj sipas SPAK është nën hetim edhe për një episod të dytë, por kësaj here, duket se ish-kryetarja e Bashkisë ka dekonspiruar veten. Sipas SPAK, ajo është shfaqur në një kronikë televizive në televizionin Apollon të Fierit në datën 6 shkurt 2021, duke njoftuar fillimin e punimeve për një segment rrugor të rrëshqitur, kontrata kishte vlerë 8.6 milionë lekë. Problemi është se shpallja e fituesit është bërë realisht një javë më vonë.
“Ish Kryetarja e Bashkisë, ka bashkëpunuar me anëtarët e KVO-së të caktuar prej saj, në urdhërin përkatës, pasi ajo nuk kishte nga ta dinte se ky operator do të kualifikohej si fitues edhe pse ishte i vetmi garues në garë. Në këtë mënyre nga tërësia e elementëve objektive dalin edhe ato subjektive, pra bashkëpunimi i saj me anëtarët e KVO-së , pasi edhe këta të fundit kanë shpallur fitues operatorin “G…… 001” , edhe pse nga hetimi ka rezultuar se ky operator nuk i plotësonte të gjitha kriteret dhe dokumentacionin sipas DST dhe duhej skualifikuar,” thotë SPAK.
Shkelja e barazisë në tenderë është një vepër penale që dënohet me burgim deri në tre vjet.
Znj. Balilaj është angazhuar në politikë prej vitit 2000 dhe është aktualisht anëtare e Asamblesë Kombëtare të Partisë Socialiste. Nën siglën e kësaj partia, ajo fitoi mandatin e parë në krye të bashkisë së Patosit në vitin 2011 dhe mandatin e dytë në zgjedhjet vendore të vitit 2015, kur fitoi me 61.78% të votave.
Link: Njoftimi i SPAK