Qeveria e Kosovës i ka kërkuar Agjencisë Kadastrale që të zbatojë një vendim të Gjykatës Kushtetuese të vitit 2016 për dhënien e tokës një manastiri ortodoks serb.
“Sot i kemi thënë Agjencisë Katastrale të Kosovës që të zbatojë vendimin e Gjykatës Kushtetuese”, tha kryeministri Albin Kurti, duke shtuar se “ministrja e Punëve të Jashtme dhe Diasporës, Donika Gërvalla, i ka dërguar Këshillit të Evropës një notë verbale njoftuese për këtë çështje”.
I dërguari i SHBA-së për Ballkanin, Gabriel Escobar, në një konferencë të përbashkët për shtyp me presidenten e Kosovës Vjosa Osmani në Prishtinë gjatë një vizite në Kosovë të mërkurën, e përshëndeti vendimin.
“Vendimi i sotëm për Manastirin, sa ishte i vështirë është edhe i rëndësishëm, dhe i falënderoj institucionet për këtë hap”, tha Escobar. Një ditë më parë, në një konferencë online për shtyp nga Brukseli, duke paralajmëruar vizitën e tij në rajon, Escobar tha se SHBA-ja aktualisht ka “një problem me komunikimin me kryeministrin” e Kosovës.
Escobar tha se Kosova ka një problem “në komunikimin e saj me Bashkimin Evropian, NATO-n, Britaninë e Madhe, Shtetet e Bashkuara dhe me shumë partnerë të tjerë përfshirë Shqipërinë dhe Maqedoninë e Veriut”, duke theksuar se partneriteti mes ShBA-së dhe Kosovës, është mes popujve të Kosovës dhe ShBA-së, nuk shkon prej një njeriu, ose një pale”.
Një vendim gjykate i vitit 2016 konfirmoi se 24 hektarë tokë e diskutueshme i përkasin manastirit të shekullit të 14-të të Deçanit, i cili është një vend Trashëgimie Botërore nga UNESCO.
Të mërkurën, Kurti tha se kishte vepruar nën presionin e Këshillit të Evropës, i cili kishte vënë si kusht zbatimin e vendimit të Gjykatës Kushtetuese për anëtarësimin e Kosovës.
“Na u bë e qartë se duhet të zgjedhim mes dy opsioneve: të zbatojmë vendimin e Gjykatës Kushtetuese dhe të na mundësohet ecja tutje me qëllim anëtarësimin në Këshill të Europës këtë vit, apo heqjen e çështjes së Kosovës nga agjenda e anëtarësimit dhe rrjedhimisht heqjen dorë nga një qëllim demokratik e shtet ndërtues të Republikës sonë”, tha Kurti.
Duke kujtuar kundërshtimin e tij ndaj vendimit të gjykatës, duke e përshkruar atë si “të dëmshëm”, Kurti tha: “Anëtarësimi i Kosovës në Këshillin e Europës nuk do të ishte vetëm një fitore historike, por edhe një hap gjigant për republikën tonë drejt njohjes nga pesë vendet evropiane që nuk e njohin Kosovën, që mundëson anëtarësimin në NATO dhe BE”.
Pesë vendet jo-njohëse të BE-së janë Spanja, Sllovakia, Rumania, Greqia dhe Qiproja.
Që nga lufta e Kosovës 1998-1999, kur NATO ndërhyri me sulme ajrore për të dëbuar forcat serbe që kishin vrarë dhe dëbuar civilë gjatë një fushate brutale kundër kryengritjes, manastiri është mbrojtur nga paqeruajtësit e NATO-s.
