Këshilltari ligjor i Gjykatës së Lartë, Gerti Shani u përball pa probleme me Komisionin e Pavarur të Kualifikimit, KPK, të mërkurën më 20 mars. Rreth dy orë e gjysmë pas përfundimit të seancës dëgjimore, Komisioni shpalli vendimin për konfirmimin në detyrë të këtij subjekti rivlerësimi.
Hetimi administrativ për ndihmësin ligjor, Gerti Shani u krye nga trupa e KPK e kryesuar nga Xhensila Pine, me relator Roland Ilian dhe anëtare Genta Tafa Bungo. Në cilësinë e vëzhguesit ndërkombëtar ishte i pranishëm Francesco Ciardi.
Relatori Ilia shpjegoi në fillim të seancës se Shani është emëruar si ndihmës ligjor në vitin 2015 pranë Gjykatës Administrative të Shkallës së Parë Vlorë, ku e ka ushtruar këtë detyrë deri në 2017-ën, kur u emërua si këshilltar ligjor në Gjykatën e Lartë.
Sipas relatorit Ilia, hetimi administrativ është kryer për pasuritë e krijuara para fillimit të detyrës dhe atyre gjatë ushtrimit të detyrës, për të cilat nuk janë evidentuar probleme dhe ka rezultuar bilanc pozitiv.
Komisioni konstatoi se subjekti dhe familja e tij kanë pasur mundësi për blerjen e një apartamenti në Tiranë në vitin 2003 kundrejt vlerës 2 milionë lekë; për një apartament në Fier në vitin 2004 për shumën 1 milion lekë + 200 mijë lekë të shpenzuara për mobilimin; për investimin në bono thesari në vitin 2003 të vlerës 3.3 milionë euro dhe krijimin e një llogarie bankare po atë vit në shumën 17 mijë USD – pasuri për të cilat ka deklaruar si burime të ardhurat nga biznesi familjar dhe nga avokatia.
Sipas relatorit Ilia, nga analiza financiare e përgjithshme paraprake për periudhën para fillimit të detyrës, subjekti i rivlerësimit ka rezultuar me bilanc pozitiv në vlerën rreth 6.2 milionë lekë.
Për rrjedhojë, nuk janë gjetur probleme financiare edhe për pasuritë e krijuara gjatë ushtrimit të detyrës.
Për një apartament të blerë pas fillimit të detyrës për çmimin 31 mijë e 310 euro, Komisioni ka gjetur se një pjesë e banesës i është dhuruar nga xhaxhai i bashkëshortes, gjë që nuk është pasqyruar në deklaratën ‘veting’. Megjithatë subjekti ka rezultuar se ka pasur mundësi për të paguar këstet për blerjen e kësaj banese.
Me bilanc pozitv ka rezultuar dhe për krijimin e një depozite 2.7 milionë lekë në vitin 2016 dhe krijimin e gjendjes cash 1.5 milionë lekë.
Sipas KPK, nuk janë gjetur probleme dhe në pasuritë e babait që i gëzon aktualisht subjekti, si dhe në disa transaksione që i ka kryer në cilësinë e ndërmjetësit, si avokat.
Këshilltari ligjor Gerti Shani mori vlerësim pozitiv edhe për figurën dhe për profesionalizmin. Ai deklaroi në fund të seancës dëgjimore se u qëndronte parashtrimeve të dorëzuara me shkrim dhe kërkoi konfirmimin në detyrë.
Komisioni u tërhoq dhe shpalli në orën 13:00 të së mërkurës vendimarrjen për konfirmimin e Shanit në detyrën që ai ushtron si këshilltar ligjor në Gjykatën e Lartë.
