Prokurori Olgert Rumnici i Prokurorisë së Beratit do të përballet të enjten më 21 mars me Komisionin e Pavarur të Kualifikimit. Procesi i tij i vetingut po kryhet nga trupa e përbërë nga Lulzim Hamitaj, Brunilda Bekteshi dhe Etleda Çiftja.
Olgert Rumnici përfundoi studimet në Shkollën e Magjistraturës në vitin 2013 dhe punon prej një dekade si prokuror pranë Prokurorisë së Beratit.
Analiza e pasurisë është një ndër tre shtyllat e rivlerësimit të prokurorëve, së bashku me vlerësimin e figurës dhe atë të aftësive profesionale. Skeda grafike tregon ndryshimin e pasurisë familjare të prokurorit Olgert Rumnici nga viti 2013 deri në fund të vitit 2019. [kliko për skedën në pdf]
Në deklarimin për herë të parë në vitin 2013, prokurori Olgert Rumnici zotëronte pasuri me vlerë 1 milion lekë, ndërsa në fund të vitit 2019, pasuria e tij familjare kap vlerën e 9 milionë lekëve.
Ai zotëron familjarisht pasuri të paluajtshme me vlerë 8.6 milionë lekë dhe likujditete bankare prej 373 mijë lekësh.
Të ardhurat familjare për periudhën deklaruese janë 9.8 milionë lekë, nga të cilat 80% kanë si burim pagën e subjektit, 8% pagat e familjarëve dhe gati 12% deklarohen nga burime të ndryshme.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 7 vite, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamuj të kuq” huamarrjet dhe detyrimet për blerjen dhe mobilimin e një apartamenti.
Në vitin 2018, subjekti Olgert Rumnici deklaron një kontratë sipërmarrje për prenotimin e një apartamenti me vlerë 70 mijë euro, nga e cila është paguar gjysma e çmimit me burim një kredi bankare prej 1.4 milionë lekësh, huamarrje prej 550 mijë lekësh si dhe kursimet nga paga ndër vite. Vlera e mbetur prej 35 mijë eurosh është detyrim ndaj shoqërisë ndërtuese.
Në vitin 2019, subjekti deklaron një huamarrje nga babai në vlerën e 250 mijë lekëve për të mbuluar shpenzimet për mobilimin e apartamentit.
