Deputetja e Partisë Demokratike, Albana Vokshi në cilësinë e kryetares së Komisionit tha në nisje të mbledhjes se këto koncensione kanë qenë “të panevojshme” dhe “abuzuese”.
“Uroj që të gjithë anëtarët e këtij komisioni të mos bëheni mburojë e këtij korrupsioni e të përdorni kartonat kundër interes publik, sepse me 200 milionë euro mund të ishin ndërtuar dhjetra spitale ultramodernë, qindra qendra qshëndetësore dhe dyfishuar pagat e mjekëve,” tha Vokshi.
Por nënkryetari socialist, Plarent Ndreca e akuzoi Vokshin për qëndrime politike dhe të parakohshme në lidhje me hetimin.
“Referuar deklaratave tuaja del e qartë se e keni paragjykuar punën e këtij komisioni,” tha Ndreca, duke i kërkuar Vokshit të respektojë parimet kushtetuese.
Debatet vijuan me akuza të ndërsjella për konflikt interesi të anëtarëve me çështjet që janë nën hetim, ndërsa Vokshi kërkoi që të gjithë anëtarët të deklarojnë zyrtarisht që nuk kanë konflikt interesi me çështjen dhe dëshmitarët që do të thirren në komision.
Deputetja e PD-së, Ina Zhupa deklaroi se Ndreca ka konflikt interesi pasi ka qenë avokat i njërit prej të pandehurve për këto koncensione, por ai mohoi që ky fakt të përbënte objekt për konflikt interesi.
“Unë kam bërë mbrojtjen në një hap procedurial që s'ka lidhje me këtë komision,” tha ai, duke shtuar se “nëse do të kishte konflikt interesi në këtë komision ajo është kryetarja, e cila është kallëzuese në SPAK për çështjen”.
Sipas Vokshit, për të dëshmuar lidhur me hetimin e dy koncesioneve do të thirren Kryeministri Edi Rama, ish-ministrat e Shëndetësisë Ilir Beqaj dhe Ogerta Manastirliu, ish-ministri i Financave, Shkëlqim Cani, ish-ministrja e Financave, Anila Denaj, ministrja aktuale e Shëndetësisë, Albana Koçiu, etj.
Pyetja e dëshmitarëve sipas planit të veprimit të komisionit do të bëhet deri më datë 10 qershor. Ndryshimet e njëanshme nga mazhoranca të ligjit për komisionet hetimore kanë klauzola bllokuese për thirrjen e dëshmitarëve, të cilët mund të jenë dëshmitarë të drejtësisë apo nën hetim nga drejtësia.
Komisioni hetimor për koncensionet në shëndetësi ishte kërkuar nga grupi opozitar i njohur si “Rithemelimi”, por u rrëzua fillimisht nga PS-ja duke sjellë dhe protestat bllokuese të deputetëve opozitarë në Kuvend. Por, pas një kompromisi politik të arritur pak ditë më parë maxhoranca pranoi ngritjen e dy komisioneve hetimore, për konçensionet në shëndetësi dhe problematikat me sistemin TIMS, me kushtin që të riformuloheshin objektet hetimore të kërkesave.
Në objektin e riformuluar opozita “harroi' dy nga katër kontratat koncensionare të dhëna në shëndetësi, duke mos përfshirë hetimin e koncesionit të shërbimit të dializës dhe të shërbimeve laboratorike.
Dy koncesionet për të cilat do të hetojë parlamenti, ai i sterilizimit dhe i chek-up, janë aktualisht nën hetim nga Prokuroria e Posaçme.