Qendra Kulturore “Aleksandër Moisiu” në Durrës po bëhet gati që t’i nënshtrohet restaurimeve përmes një fondi prej 595 milionë lekësh të akorduar nga bashkia e qytetit dhe Ministria e Kulturës, Ekonomisë dhe Inovacionit.
Megjithatë, kjo qendër është një ombrellë për disa institucione të kulturës në Durrës, çka e bën të vështirë menaxhimin e përbashkët të tyre.
Sipas drejtorit të qendrës, Elio Bajramaj, drejtoria administron përveç teatrit edhe Galerinë e Arteve Pamore, Mauzoleun e Dëshmorëve dhe Muzeun Etnografik.
Muzeu Etnografik vazhdon të qëndrojë i mbyllur për shkak të dëmtimeve të rënda që u shkaktuan nga tërmeti i 26 nëntorit 2019, ndërsa e ardhmja e tij vazhdon të jetë e paqartë për shkak të problemeve me pronësinë. Ndërsa Galeria e Arteve dhe Mauzoleumi pritet që të jenë pjesë e rikonstruksioneve.
Sipas Bashkisë së Durrësit, shuma e përgjithshme në dispozicion të rikonstruksionit të qendrës kulturore është 595 milionë lek, 47 përqind e të cilave i përkasin Ministrisë së Kulturës, Ekonomisë dhe Inovacionit dhe pjesa tjetër pushtetit vendor. Bashkia shtoi gjithashtu se identiteti i objektit nuk do të ndryshojë, duke ruajtur kështu vlerat e tij historike dhe identitetin urban të zonës përreth.
“Projekti i ri që do të fillojë realizimin brenda këtij viti, do të plotësojë jo vetëm standardet në fuqi në vendin tonë por dhe standardet ndërkombëtare që duhet të kenë objektet e kësaj rëndësie,” premtoi Bashkia në një përgjigje me shkrim.
Teatri i Durrësit përbën një rast të veçantë të bashkëjetesës mes godinës që u ndërtua 60 vjet më parë dhe një monumenti mjaft të rëndësishëm arkeologjik, Termat Romake, që i përkasin shekullit II para erës së re.
Godina ngrihet mbi kolona prej betoni për të ruajtur monumentin arkeologjik.
“Përforcimi i kolonave mbi të cilat është vendosur skena dhe salla pjesërisht, nuk do të prekë elementet e zbulimit arkeologjik,” tha drejtori Bajramaj për BIRN.
“Sipas projektit të fundit, në pjesën e betonuar që shërben si tavan i Termave dhe dysheme e sallës së teatrit do të ndërhyhet vetëm me qëllimin e shmangies së rrymave të ajrit mes tyre,” shtoi ai, ndërsa theksoi se pjesë e ndërhyrjes do të ishte edhe sistemi aktual i ngrohjes.
Arkitektët po bashkëpunojnë aktualisht me artistët, për të gjetur zgjidhjet më të favorshme për cilësitë e skenës dhe të sallës.
Driada Dervishi, regjisore e kësaj trupe, u shpreh se një ekip turk profesionistësh do të ofrojë mbështetjen e tij për trajtimin e skenës, ndërsa po punohet për instalimin e sistemit të ndriçimit nga salla dhe për hollin në hyrje të teatrit.
