Kryetarja e Kuvendit, Lindita Nikolla refuzoi të martën përmes një letre kërkesën e kryetarit të grupit parlamentar të PD-së, Gazmend Bardhi, për të mbledhur Konferencën e Kryetarëve për të vendosur mbi zbatimin e vendimit të Gjykatës Kushtetuese lidhur me mandatin e deputetes Olta Xhaçka.
Bardhi kërkoi të hënën mbledhjen e Konferencës për të vendosur futjen për votim në seancën më të afërt të mocionit të opozitës për interpretimin e mandatit të deputetes socialiste dhe dërgimin e tij në Gjykatë Kushtetuese.
Në përgjigjen e saj, Nikolla pretendon se kjo çështje nuk është kompetencë e Konferencës së Kryetarëve, por e organeve të tjera të Kuvendit, përkatësisht e Këshillit për Rregulloren, Mandatet dhe Imunitetin.
“Këshilli për Rregulloren, Mandatet dhe Imunitetin do ta marrë në shqyrtim raportin dhe në bazë të pikës 7 të këtij neni, pas përfundimit të diskutimeve, Këshilli i paraqet Kryetarit raportin, i cili përmban të gjitha qëndrimet për çështjen. Raporti i përcillet seancës plenare brenda dy javëve nga përfundimi i shqyrtimit të çështjes,” thuhet në letrën e Nikollës.
Kjo përgjigje duket se është vetëm një nga mekanizmat e shumtë që mazhoranca ka përdorur prej më shumë se një viti për të zvarritur pa afat zbatimin e vendimit të Gjykatës Kushtetuese, i cili detyron Kuvendin të dërgojë në këtë gjykatë për interpretim mandatin e Xhaçkës, sipas kërkesës së 1/10 së deputetëve të opozitës.
Qëndrimi i Nikollës në letrën dërguar Bardhit bie gjithashtu në kontradiktë me qëndrimin e mëparshëm të kabinetit të saj në një komunikim me BIRN-in për këtë çështje gjatë muajit tetor.
“Konferenca e Kryetarëve do të vendosë datën e shqyrtimit dhe brenda 2 javëshit të parë të nëntorit, Këshilli i Rregullores dhe Mandateve do të marrë një vendim,” tha në tetor shefi i kabinetit të Nikollës, Kosta Barjaba.
Mandati i Xhaçkës u kthye në objekt diskutimi pasi bashkëshorti i saj, Artan Gaçi përfitoi statusin e investitorit strategjik për të ndërtuar një hotel në Dhërmi ndërsa një vendim qeverie i dha atij të drejtën që të përdorte brigjet e detit përballë hotelit.
Opozita iu drejtua Gjykatës Kushtetuese dhe në janar 2023, kjo gjykatë rrëzoi si antikushtetues një vendim të Kuvendit për të mos e dërguar çështjen Xhaçka në Kushtetuese – por zbatimi i këtij vendimi po zvarritet prej më shumë se një viti.
Procedura parlamentare për zbatimin e këtij vendimi ka ngecur prej muajsh në zyrën e Nikollës, por ajo e ka justifikuar mosveprimin e saj me arsye të ndryshme, që nga axhenda e ngjeshur deri tek mungesa e normalitetit në Kuvend.
Në letrën dërguar Bardhit, Nikolla i referohet një raporti të miratuar vetëm me votat e shumicës në Këshillin e Legjislacionit, i cili rekomandon që zbatimi i vendimit të Gjykatës Kushtetuese, në kundërshtim me praktikën e mëparshme parlamentare që kalonte direkt në seancë plenare, të rikthehet në pikën zero të diskutimit në Këshillin e Mandateve.
Por, kryeparlamentarja nuk sqaron se pse ajo nuk e ka thirrur deri më sot mbledhjen e Këshillit të Mandateve, ndërkohë që raporti të cilit i referohet i është dorëzuar që në muajin korrik.
Ligjërisht, Këshilli i Mandateve kryesohet nga Kryetari i Kuvendit dhe shqyrton rastet e pazgjedhshmërisë, sipas nenit 69 të Kushtetutës, si dhe bën verifikimin e mandatit të deputetit.