Prokuroria e Posaçme kundër Korrupsionit dhe Krimit të Organizuar, SPAK njoftoi të hënën më 15 prill sekuestrimin e pasurive të pesë personave të hetuar apo dënuar për krim të organizuar. Në njoftim sqarohet se në shkurt është regjistruar kryesisht procedimi pasuror në lidhje me pasuritë e katër vëllezërve Zamir, Vladimir, Dilaver (Oliver) dhe Mentor Hoxha, si dhe të nipit të tyre, Alfonc Hoxha. Hetimi pasuror ka nisur bazuar në një procedim të regjistruar ndaj Zamir Hoxhës për veprat penale “Trafikimi i narkotikëve”, si pjestar i një grupi të struktuar kriminal, me aktivitet trafikimin dhe shpërndarjen e lëndëve narkotike në Danimarkë, Belgjikë, Holandë, Suedi, Norvegji dhe Gjermani, gjatë periudhës kohore të viteve 2018-2019. Sipas prokurorisë, pjesa më e madhe e anëtarëve të këtij grupi të struktuar kriminal të kryesuar nga shtetasi shqiptar, Jetmir Kastrati (Sokol Krasniqi), janë deklaruar fajtorë dhe janë dënuar nga autoritetet gjyqësore në Danimarkë.
Po ashtu, ka rezultuar se katër vëllezërit Hoxha kanë qenë të hetuar apo dënuar përpara vitit 2012 në Itali për vepra penale të rënda, si pjesëmarrje në organizatë kriminale me qëllim shfrytëzimin dhe favorizimin e prostitucionit, emigracionit klandestin dhe trafikimit të lëndëve narkotike. Nipi i tyre, Alfonc Hoxha, rezulton se është arrestuar në Gjermani në vitin 2020 për veprën penale “Shkelje e ligjit për lëndët narkotike”.
Me kërkesë të SPAK, gjykata respektive, ka vendosur sekuestrimin e disa pasurive të luajtshme dhe të paluajtshme të të hetuarve dhe personave të lidhur me ta, konkretisht të pesë llogarive bankare me gjendje totale rreth 94 mijë euro; pesë llogari me gjendje 145 mijë lekë; dy troje dhe dy ndërtesa me tre dhe dy kate në fshatin Domje të Bashkisë Vorë; dy ngastra toke me sipërfaqe 8000 m2 dhe 800 m2 po në Dojme; një njësi me sipërfaqe ndërtimi 325.8 m2 në Mëzez të Kasharit; si dhe dy ngastra toke me sipërfaqe 22 mijë e 500 m2 dhe 9936 m2 në Fushë Mamurras të Kurbinit.
