Prokuroria e Posaçme Kundër Korrupsionit dhe Krimit të Organizuar, SPAK njoftoi të enjten më 25 prill përfundimin e hetimeve dhe dërgimin për gjykim të një të pandehuri për “Korrupsion aktiv në zgjedhje”, gjatë angazhimit të tij në fushatën për zgjedhjet vendore që u zhvilluan më 14 maj të vitit 2023, për Bashkinë Vorë. SPAK sqaron se vajza e të pandehurit Agim Loci, ka qenë pjesë e listës së kandidatëve për Këshillin Bashkiak Vorë, si pjesë e një prej koalicioneve pjesëmarrës në zgjedhje.
“Hetimi ka evidentuar se, i pandehuri Agim Loci, i ka ofruar shtetasit A.K. shumën monetare në vlerën prej 10 000 (dhjetë mijë) lekë, për të ndikuar në vullnetin e tij, në mënyrë që të votojë një subjekt të caktuar politik në zgjedhjet për organet e qeverisjes vendore, që janë zhvilluar në datën 14 Maj, 2023 (Bashkia Vorë)”, citohet në njoftimin e prokurorisë.
Sipas njoftimeve për shtyp të publikuara në faqen online të SPAK, janë dërguar për gjykim për korrupsion aktiv ose pasiv në zgjedhje të pakëtën 9 persona, mes të cilëve dhe të zgjedhurin si kryetar i Bashkisë Himarë, Alfred Beleri, i cili dhe u deklarua fajtor në Gjykatën e Posaçme të Shkallës së Parë.