Porta e banesës së gjyqtarit të Shkodrës, Tonin Stërkaj u shpërthye me lëndë plasëse mëngjesin e të dielës rreth orës 03:13, duke shkaktuar dëme materiale. Fatmirësisht nuk ka pasur të lënduar nga ky shpërthim i ndodhur në banesën e gjyqtarit Stërkaj në lagjen “Tom Kola” në Shkodër, ngjarje që po hetohet nga prokuroria si kanosje për shkak të detyrës.
I pyetur nga BIRN, gjyqtari Tonin Stërkaj e cilësoi ngjarjen si një goditje, jo vetëm ndaj tij dhe familjes së tij, por edhe ndaj sistemit të drejtësisë dhe gjithë shoqërisë shqiptare. Ai u rezervua të jepte informacione për konflikte të mundshme për shkak të detyrës. Ai tha se kishte që prej orës tre të mëngjesit që kishte dhënë shpjegimet e nevojshme në polici, por shtoi se ishte e nevojshme që të ruhej sekreti hetimor.
Drejtuesi i Prokurorisë së Shkodrës, Albert Murçaj theksoi gjithashtu në një bisedë telefonike për BIRN se ngjarja po hetohej në kuadrin e kanosjes për shkak të detyrës, shkatërrim të pronës me lëndë palsëse dhe mbajtje e përdorim i lëndëve plasëse. Sipas Murçajt, ende nuk ka emra konkretë për këtë ngjarje, por janë sipas tij duke u verifikuar kamerat e sigurisë të ndodhura në zonën e ngjarjes, si dhe po hetohet në drejtim të një kanosje të mundshme për shkak të detyrës. Ai sqaroi se nga këqyrja paraprake, dyshohet se shpërthimi i lëndës plasëse duket se është aktivizuar me fitil.
Këshilli i Lartë Gjyqësor e dënoi ngjarjen përmes një deklarate për mediat, duke e konsideruar atë një cënim për sigurinë e gjyqtarit Stërkaj dhe kërcënim për të gjithë shoqërinë shqiptare.
“Këshilli i Lartë Gjyqësor dënon aktin kriminal dhe i kërkon organit të akuzës hetimin, zbardhjen e ngjarjes dhe të nxjerrë para përgjegjësisë ligjore personat e përfshirë”, citohet në deklaratën e KLGJ-së ku shprehet edhe mbështetja e të gjithë gjyqtarëve për t'u garantuar siguria e tyre me qëllim që të ushtrojnë detyrën pa frikën e kërcënimeve,” deklaroi KLGJ.