Numri i apartamenteve që jepen me qira për qëllime turistike në Durrës sa vjen e rritet. Po ashtu rriten edhe vështirësitë për menaxhimin e tyre. Administratorët e këtyre bizneseve me kohëzgjatje disa ditore ankohen për mungesën e fuqisë punëtore, në trajtimin e tyre.
Gert Rakipllari, i cili menaxhon disa apartamente në zonën bregdetare të qytetit tha për BIRN se njësitë jepen me qira për periudha 3-4 ditore, dhe se kjo mënyrë jep të ardhura të mira.
“Por nga ana tjetër, me gjithë rritjen e ndjeshme të rrogave, mbetet tepër e vështirë të gjesh punonjës pastrimi dhe mirëmbajtjeje”, theksoi Rakipllari.
Sipas tij, mjaft njerëz filluan t'i përkushtohen këtij biznesi, duke shfrytëzuar apartamentet e lira, kryesisht në qytet dhe në vijën bregdetare në Jug të tij.
Disa prej administratorëve të rinj, përfshinë edhe familjarët e tyre në menaxhimin e apartamenteve, megjithatë intensiteti i ndërrimit të turistëve të huaj e bën të domosdoshëm punën e grupit të punonjësve të kualifikuar.
“Numri i ofertave për punonjës shtëpie ka rënë dukshëm, kryesisht për shkak të largimit të qytetarëve jashtë vendit”, tha për BIRN Eda Pajuni, e cila drejton një agjenci për ndërmjetësim punësimi në qytetin bregdetar.
Pajuni tha se ky është një biznes i ri për të cilin mungojnë plotësisht të dhënat, ose më mirë mungon një databazë për njohjen e numrit të tyre apo të periudhave kur apartamentet jepen me qira.
Ajo shton se mungesa e kualifikimit dhe e kulturës së punës mbeten ende të pazgjidhura për grupin e punonjësve që janë përfshirë në menaxhimin e apartamenteve me qëndrim afat-shkurtër.
“Administratorët e këtyre apartamenteve nuk përfshihen në listën e profesioneve të lira”, tha Eda Pajuni, sipas së cilës, në grupin me 169 profesione të lira të publikuar nga shteti, administratorët e apartamenteve nuk bëjnë pjesë si të tillë.
Sidoqoftë, apartamentet që jepen me qira 3-4 ditore në dimër dhe 7-10 ditë në stinën e verës janë një realitet turistik, që po merr gjithnjë e më shumë përmasa në Durrës.
Punonjësit e këtij sektori thonë se qyteti ka numrin më të madh të apartamenteve në shërbim të turizmit disa ditor.
“Para 5-6 vitesh, një zonjë nga Italia mori një apartament me qira në zonën e Currilave dhe filloi ta shfrytëzojë si “krevat e mëngjes – Bed & breakfast””, tregon Nadirja, një nga banorët e lagjes, duke shtuar se në atë kohë askush nuk e njihte sistemin e qirasë disa ditore.
Mjaft banesa që mbaheshin të mbyllura nga pronarët, tashmë janë vënë në shërbim të turizmit me periudha të shkurtra, ku vizitorët dhe pushuesit qëndrojnë vetëm disa ditë.
“Nuk vijnë vetëm nga vendet e Europës, por edhe nga Azia. Dhe nuk janë të pakët as vizitorët kinezë”, tha për BIRN Agop Bodikian, i cili menaxhon pesë apartamente pranë rrugës Teuta – Iliria, në plazhin e Durrësit.
Megjithëse ka angazhuar edhe familjarët e tij në mirëmbajtjen e apartamenteve, Bodikian e ndjen mungesën e fuqisë punëtore.
“Deri tani ne i kemi dhënë apartamentet me qira afatgjata, por mënyra disa ditore me pushues të huaj ka më tepër leverdi”, thotë Bodikian.
Gert Rakipllari kërkon më shumë lehtësi nga shteti për operatorët turistikë.
“Disa nga vizitorët që mahniten nga pamja e kodrave dhe e bregdetit kërkojnë të realizojnë një shëtitje me barkë me motor. Por kjo është e pamundur, në kushtet e rregullave të vendosura nga policia kufitare”, tha Rakipllari.
Ai thotë se mungesat e fuqisë punëtore janë më se të zakonshme për të gjithë bizneset e sektorit turistik. Këtë vit ata i kanë kërkuar qeverisë të ndërhyjë për ta përfunduar ciklin akademik universitar më shpejt.
“Përfshirja e studentëve në punë pranë hoteleve dhe restoranteve që në muajin qershor, do t'i shërbente përgatitjes dhe ecurisë së mirë të sezonit turistik”, përfundoi Rakipllari.