Pesëmbëdhjetë shtetas të huaj, të cilët nuk kanë ardhur kurrë në Shqipëri, rezultuan pronarë, administratorë dhe anëtarë të bordeve drejtuese të shtatëmbëdhjetë kompanive aksionere të regjistruara në Shqipëri. Këta shtetas të huaj përfaqësojnë një hartë të gjerë të globit, nga ishull i largët i Kubës në kontinentin amerikan në Spanjë, Gjermani, Kroaci, Maltë, Belgjikë e Itali në Evropë apo Indi dhe Bangladesh në Azi.
Gjithsesi, prokuroria e Tiranës thotë se pas këtyre shtetasve të huaj, të cilët, sipas sistemit TIMS nuk e kanë vizituar kurrë Shqipërinë, gjenden shtatë shqiptarë, mes të cilëve një ish-punonjës i Qendrës Kombëtare të Biznesit, të cilët, përmes krijimit të kompanive false, kanë arritur të lëshojnë fatura fiktive me vlerë 200 milionë lekë. Këto fatura fiktive preferohen nga bizneset, te cilat, në këtë mënyrë pakësojnë detyrimin e tyre për tatimin e vlerës së shtuar ndërsa kuadri aktual ligjor ia heq atyre çdo përgjegjësi ligjore dhe administrative.
Prokurorët llogarisin se faturat false të këtyre kompanive false i kanë hequr buxhetit të shtetit rreth 60 milionë lekë të ardhura.
“Nga analizimi i fakteve, u provua se janë krijuar dhe regjistruar në mënyrë fiktive me anë të falsifikimeve, 17 subjekte tregtare, të gjitha me aksioner administrator dhe pjestar bordi drejtues, shtetas të huaj, përkatësisht 15 shtetas nga vende si Kuba, Spanja, Germania, Kroacia, Malta, Belgjika, Italia, India, Bangladeshi. Të 17 subjektet tregtare kanë kryer shitje në mënyrë fiktive në vlerën 200,000,000 lekë, duke i shkaktuar një dëm shtetit në vlerën 60,000,000 lekë”, citohet në njoftim.
Sipas prokurorisë, nga hetimet ka rezultuar se këto subjekte nuk kanë pasur asnjëherë punonjës, mjete ose adresa sekondare për të kryer punimet të cilat kanë faturuar. Ndërkohë, nga të dhënat e sistemit TIMS, ka rezultuar se të 15 shtetasit e huaj të cilët kanë firmosur regjistrimet e subjekteve pranë QKB-së, nuk kanë hyrë në asnjë moment në Territorin e Shqipërisë. Po ashtu, në njotim thuhet se është provuar se, dokumentet e dorëzuara nga këta subjekte në QKB, në bankat e nivelit të dytë, si dhe caktimi ekspertëve kontabël në statutet e tyre, janë të falsifikuara.
Ish-specialisti pranë QKB-së ka mundur të kryejë regjistrimin e katër subjekteve tregtare me status shoqëri aksionere, Sh.A., ndërsa ekonomosti i marrë nën hetim, akuzohet se ka krijuar kushtet për të furnizuar subjekte të treta nëpëmjet subjekteve fiktive për të cilat ka pasur akses në sistemet e tyre si dhe dokumentacionin tatimor, të blloqeve të TVSH-së. Prokuroria ka kërkuar në gjykatë caktimin e masës së sigurimit personal “arrest në burg” për një prej të hetuarve, për një tjetër “arrest në shtëpi”, ndërsa për pesë të tjerët “detyrim për t'u paraqitur në policinë gjyqësore”.
Në rastin konkret, prokuroria vëren se të gjitha faturat false janë lëshuar për një subjekt të vetëm që operon në fushën e kromit. Kromi dhe ndërtimi janë dy sektorët e ekonomisë që sipas FMN-së janë prekur nga mashtrimi me TVSH-në.
Falsifikime të tilla ndodhin rëndom në Shqipëri dhe Fondi Monetar Ndërkombëtar ka këshilluar që ato të luftohen duke kryer ndryshime në ligjin fiskal, përmes të cilave, kompanive që pranojnë fatura të tilla false t'u ringarkohet detyrimi përmes parimit se ato “duhej ta dinin” që TVSH-ja e faturës së lëshuar do të përfundonte e papaguar.
Megjithatë, në shumicën e rasteve, hetimet e prokurorëve duket se janë mjaftuar me identifikimin e falsifikatorëve që kanë lëshuar faturat e pavërteta ndërsa nuk ka raste të njohura kur hetimet të kenë zbuluar bashkëpunim mes kompanive që i kanë pranuar faturat dhe të cilat kanë përfituar edhe ulje të detyrimit të TVSH-së.
Në përfundim, edhe pasi falsifikatorët arrestohen, dëmi mbi xhepat e taksapaguesve nuk rekuperohet.