“Vizita e kryeministres së Italisë Giorgia Meloni më 5 qershor në portin e Shëngjinit në Shqipëri vë në dukje çmendurinë e skemës së Italisë për të dërguar në Shqipëri migrantët dhe azilkërkuesit e ndaluar në Detin Mesdhe,” deklaroi Judith Sunderland, ndihmëspërgjegjësja për Evropën dhe Azinë Qendrore në organizatën ndërkombëtare Human Rights Watch.
Organizata e ka kritikuar disa herë marrëveshjen si me rrezik potencial për dhunimin e të drejtave të njeriut ndërsa e ka vlerësuar atë si një farsë mizore, e destinuar për të ushqyer politikën e brendshme në Itali, duke e paguar shtrenjtë, por pa sjellë zgjidhje konkrete dhe të arsyeshme për problemin e emigrimit.
Italia thotë se marrëveshja do t’i mundësojë asaj të ndajë emigrantët meshkuj që kapen në det, t’i mbyllë në Gjadër për një procedurë të shpejtë të shqyrtimit të kërkesës për azil, për t’u pasuar nga një deportim në vendin e origjinës, në rast se vendi i origjinës klasifikohet si “i sigurt”. Organizata vëren me shqetësim se Italia ka vlerësuar si vende “të sigurta” edhe shtete të tilla si Egjipti, Tunizia, Algjeria apo Kameruni, ku në fakt ka raste të dokumentuara për përdorimin e torturës kundër kritikëve të qeverisë.
Italia pritet të shpenzojë me 670 dhe 850 milionë euro për këtë skemë, e cila është normalisht më e kushtueshme se sa trajtimi i zakonshëm në territorin italian.
Pyetur për rrezikun e dhunimit të të drejtave të njeriut nga kjo marrëveshje, kryeministri shqiptar Edi Rama, i cili dikur ka qenë vetë emigrant politik në Francë, deklaroi se “kjo është vetëm një mënyrë se si mund të shihet problemi”.
“Larg nga të qenit një ‘model për t’u ndjekur’, vizita shpalosi edhe një herë faktin që qeveria Meloni nuk ka një përqasje të arsyeshme dhe njerëzore përkundrejt migrimit,” thuhet në deklaratën e HRË. “Marrëveshja italo-shqiptare është e kushtueshme, i vendos njerëzit në rrezik dhe ka gjasa nuk do të ndihmojë për të penguar njerëzit që të hipin në varka për të kaluar Mesdheun. Ajo është një ide e keqe që po bëhet gjithnjë edhe më e keqe,” shton deklarata.
