Gjykata e Posaçme e Shkallës së Parë vendosi të mërkurën më 10 korrik konfiskimin e disa prej pasurive të sekuestruara të Aurel alias Altin Hoxhallari dhe të personave të lidhur me të. Aurel Alias Altin Hoxhallari u dënua në maj të vitit 2023 me burgim të përjetshëm për “Vrasje me paramendim për interes”, kryer në bashkëpunim, në formën e grupit të strukturar kriminal, në dëm të viktimës Dejvi Kasmi.
Në përfundim të gjykimit pasuror janë konfiskuar 50 m2 ndërtimore në një objekt një katësh në Yzberisht, pasuri për të cilën ka aplikuar për legalizim në vitin 2009; një pasuri e lidhur me një banesë trekatëshe në emër të një familjareje të tij; si dhe një banesë dhe një magazinë në Kodër – Mëzez në emër të një familjari tjetër. Gjykata ka vendosur që këto pasuri t’i kalojnë shtetit.
Ndërkohë, gjykata ka vendosur heqjen e masës së sekuestros për tre ngastra toke në Yzberisht dhe një apartament në Tiranë.
