“Kolegët kërkojnë kohë për të vlerësuar dhe njëherë bindjen tonë,” njoftoi të mërkurën gjatë mbledhjes drejtuesja e nënkomisionit të posaçëm, Klotilda Bushka.
Votimi është parashikuar të bëhet mbi listën e dorëzuar nga Sekretari i Përgjithshëm i Kuvendit, i cili ka skualifikuar 4 kandidatë, duke lënë në garë vetëm dy emra për dy vende vakante. Për KLGJ-në janë kualifikuar kandidatët Erjon Fejzulla dhe Violanda Theodhori, ndërsa për KLP në garë është vetëm Fejzulla.
Nënkomisioni mund të vendosë me konsensus mes PS-PD që të kalojë kandidatët e skualifikuar në listën e të kualifikuarve dhe t’i japë mundësi Kuvendit të ketë më shumë mundësi zgjedhjeje ose mundësinë e zhvillimit të shortit për anëtarët e rinj.
Kreu i grupit parlamentar të PD, Gazmend Bardhi propozoi që nënkomisioni të kualifikonte të gjithë kandidatët e skualifikuar nga Sekretari i Përgjithshëm, Genc Gjoncaj.
Sipas Bardhit, argumentet për skualifikimin e tyre janë të pabazuara në ligj dhe se në të paktën dy raste, Gjonçaj ka dalë kundër vendimeve të gjykatës administrative, e cila ka vendosur legjitimitetin e tyre si kandidatë.
“Sekretari i Përgjithshëm na ka prodhuar dy standarde,” tha Bardhi, duke iu referuar procesit të përzgjedhjes së kandidatëve nga radhët e avokatisë, ku Gjonçaj kishte pezulluar procesin në pritje të zbardhjes së vendimit të gjykatës për një kandidat.
“Kurse këtë radhë thotë nuk na intereson se çfarë ka thënë gjykata,” shtoi ai duke iu kërkuar kolegëve socialiste që të merrnin në konsideratë zbatimin e vendimeve të gjykatave për të njëjtin proces dhe të kualifikonin emrat e skualifikuar.
Bëhet fjalë për kandidatët Altin Shegani dhe Lefterie Lleshi, të cilët fituan gjyqin ndaj komisionit ad-hoc të ngritur nga Avokati i Popullit, i cili i kishte skualifikuar për mosplotësim të kritereve ligjore.
Argumenti i Gjonçajt për skualifikimin e tyre nga gara lidhet me mosvërtetimin prej tyre të aktivizmit në 5 vitet e fundit në organizata të shoqërisë Civile, kriter që e kërkojnë dispozitat ligjore.
Po ashtu, Bardhi kërkoi rikualifikim të kandidatit Altin Hazizaj, me argumentin se vendimi penal ndaj tij i ka kaluar afatet e rehabilitimit sipas ligjit të dekriminalizimit.
Bardhi e cilësoi të pabazuar edhe skualifikimin e kandidates tjetër, Juelda Lamçe.
Drejtuesja e nënkomisionit, Bushka, në komentin përmbyllës tha se dhe ajo ishte e mendimit se “vendimet e gjykatës, kur janë pjesë e një dosjeje, duhet të merren në konsideratë”, por sqaroi se pretendimi i Bardhit për ngjashmërinë me vendimet e gjykatës në dy proceset e përzgjedhjes së kandidatëve nuk qëndronte.
Sipas saj, argumentet ligjore për secilin rast do të ndihmonin deputetët në vendimmarrje.
Në proceset e mëparshme mazhoranca ka votuar kundër ndryshimit të listës së kualifikuar nga sekretari i përgjithshëm i Kuvendit. Plotësimi i vakancave në dy këshillat është me 6 muaj vonesë pasi mandati i 6 anëtarëve të këshillave që pritet të zëvendësohen nga lista e avokatisë dhe ajo e shoqërisë civile ka përfunduar që në muajin dhjetor.
