Gjyqtarja Shpëtime Pitaku e Gjykatës së Durrësit po përballet të mërkurën më 24 korrik me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Xhensila Pine, Firdes Shuli dhe Olsi Komici.
Shpëtime Pitaku e ka nisur karrierën në sistemin e drejtësisë në vitin 1993 dhe punon prej më shumë se dy dekadash si gjyqtare pranë Gjykatës së Rrethit Durrës. Në vitin 2015, Pitaku u kallëzua në Prokurori nga Inspektoriati i Lartë i Deklarimit dhe Kontrollit të Pasurive për dyshime për fshehje pasurie, por hetimi u mbyll pa rezultat.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë familjare të gjyqtares Shpëtime Pitaku nga viti 2003 deri në fund të vitit 2018. [Kliko për skedën në PDF].
Në deklarimin për herë të parë në vitin 2003, gjyqtarja Shpëtime Pitaku deklaronte pasuri me vlerë 15.8 milionë lekë, ndërsa në fund të vitit 2018, pasuria e saj familjare është rritur me 4.5 herë, duke kapur vlerën e 72.2 milionë lekëve.
Ajo zotëron familjarisht pasuri të paluajtshme me vlerë 50.1 milionë lekë, likujditete bankare prej 5.2 milionë lekësh, kursime në cash prej 3.4 milionë lekësh si dhe pasuri të luajtshme prej 9.9 milionë lekësh. Gjithashtu, gjyqtarja Pitaku deklaron sende me vlerë të veçantë prej 3.4 milionë lekësh.
Të ardhurat familjare gjatë periudhës deklaruese janë 103.4 milionë lekë, nga të cilat paga e subjektit zë 17% të totalit, të ardhurat nga biznesi 28%, të ardhurat nga shitja e pasurive të patundshme 25%, të ardhurat nga qiratë në masën 22% dhe pagat e familjarëve në masën 4.8%.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 15 vite, tre prej deklaratave rezultuan me probleme.
Kontrolli aritmetik dhe logjik për subjektin Shpëtime Pitaku ka rezultuar me probleme në vitin 2010, 2014 dhe 2016. Gjatë këtyre viteve, subjekti dhe familjarët e saj kanë shtuar asete që nuk justifikohen me burimet financiare të deklaruara. Balanca negative totale është rreth 7,6 milionë lekë.
Në deklarimin e vitit 2003 dhe atë Periodik/Vjetor 2004, subjekti deklaron prona të trashëguara nga prindërit e saj dhe të bashkëshortit, të cilat janë shitur pjesërisht në vitet në vijim duke shërbyer si burim i drejtpërdrejtë për financimin e aseteve të reja.
Në vitin 2014 deklarohet blerja e ambient shërbimi me sipërfaqe 71.67 m2, kati përdhe me vlerë 70,000 euro. Burimi financiar për këtë investim është i paqartë, pasi deklarohet se shlyerja e 20,000 eurove është tërhequr nga llogaria bankare në euro tek Raiffeisen Bank, por një llogari e tillë nuk është deklaruar më parë. Në vitin 2015 po nga e njëjta llogari bëhet shlyerja e shumës 10,000 euro. Gjithashtu deklarohet që shuma prej 40,000 eurosh do të likuidohet me kredi bankare, por në deklarimet e ardhshme nuk është pasqyruar kredi hipotekore marrë me qëllim likuidimin e diferencës së çmimit.
Gjatë periudhës deklaruese 2003-2018, subjekti dhe familjarët e saj kanë kryer transaksione të shpeshta me pasuritë e luajtshme, ku regjistrohen rreth 15 automjete të blera dhe rreth 10 transaksione shitjeje.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Për më shumë dokumente vizitoni databazën tonë dokumente.reporter.al
