Partia Demokratike akuzoi të premten Kryeministrin Edi Rama se ka përdorur detyrën e tij për të miratuar akte ligjore nga të cilat pjesëtarë të trungut të tij familjar kanë përfituar një pronë, 22.4 hektarë tokë në Vuno, një fshat në bregdetin e Vlorës, nga ku ka origjinën nëna e tij.
Sipas akuzave nga selia e PD-së trashëgimtarët e familjes Koleka, mbiemri i vajzërisë së nënës së kryeministrit, e kanë përfituar në mënyrë të kontestueshme nga ana ligjore, ndërsa një kuadër ligjor i miratuar nga qeveria ka lehtësuar procedurat e marrjes së pronës.
Sekretari për Çështjet Ligjore Ivi Kaso në një dalje për mediat rreshtoi “faktet’ që nga një vendim i Gjykatës së Apelit Vlorë në favor të trashëgimtarëve të tjerë të kësaj prone, më pas listë shpallje të regjistrimit fillestar të pronave të vitit 2021, ku mes trashëgimtarëve figuron dhe emri Aneta Rama (Koleka) dhe një sërë VKM dhe ligjesh, të cilat ai pretendoi se përbënin “gjithë infrastrukturën ligjore për të përfituar pronën në fjalë”.
“Agjencia e Trajtimi të Pronave kishte refuzuar fillimisht ta regjistronte këtë pronë për shkak se nuk vërtetonte aktin e shpronësimit nga regjimi komunist pas vitit 1944”, tha Kaso, duke shtuar se ndryshimet ligjore pas vendimit të gjykatës në favor të trashëgimtarëve Koleka detyruan këtë agjenci që t’a regjistronte dhe jo ta rishqyrtonte çështjen, siç parashikonte ligji i mëparshëm.
PD po e përdor rastin si krahasim me akuzat e ngritura nga drejtësia për kreun e kësaj partie, ish-kryeministrin Sali Berisha, i cili është në hetim se ka ndryshuar ligjet në favor të përfitimit të direkt të dhëndrit të tij Jamarbër Malltezi nga privatizimi i ish-klubit sportiv “Partizani”.
Rama i hodhi poshtë akuzat dhe e cilësoi “përpjekje të dëshpëruar për të bërë paralele” mes rasteve, por ai pohoi se ai vetë, familja dhe fisi i tij ishin trajtuar në mënyrë të barabartë sipas ligjit.
“Sot e gjithë ditën, duzina e trashëgimtarëve të pronave të stërgjyshit tonë në Vuno të Himarës, njësoj si plot trashëgimtarë të tjerë të kësaj zone – ku sapo isha së bashku me kryebashkiakun tonë të së dielës së ardhshme, Vangjel Tavon – nuk i ka marrë ende çertifikatat e pronësisë”, pretendoi Rama në një status në rrjetin social X .
