Një 34-vjeçar, i cili punonte si brigadier në një galeri private kromi është plagosur pas shembjes së një masivi gurësh në Zonën D të minierës. Minatori i identifikuar me inicialet N.A, punonte në këtë galeri për nxjerrjen e kromit.
“Më datë 09.08.2024, në një subjekt minerar në Bulqizë, dyshohet se është aksidentuar gjatë punës shtetasi N. A., 34 vjeç, me detyrë brigadier në këtë subjekt”, njoftoi policia.
Ndërkohë burime nga spitali i Bulqizës, bëjnë me dije se i aksidentuari kishte marrë plagë në kokë, trup dhe këmbë. Pasi ka marrë mjekim emergjent ai është nisur për tek spitali i Traumës, për një mjekim më të specializuar.
Aksidentet e rënda në punë në sektorët e ndërtimit, minierave dhe energjetikës shkaktojnë çdo vit dhjetëra viktima. Vetëm gjatë muajit Maj dhe Qershor 6 punëtorë u vranë, në Lezhë, Tiranë dhe Dibër. Disa të tjerë kanë marrë plagë të rënda. Aksidentet janë shoqëruar me arrestimin e disa drejtuesve teknikë dhe administratorëve të kompanive, por siç BIRN ka gjetur në disa investigime penalitet ndaj këtyre rasteve mbeten minimale dhe masat e marra nuk sjellin ndryshime sa i përket sigurisë në punë.
