Një 21 vjeçar, banues në Durrës, u arrestua të enjten nga Policia e Tiranës për veprat penale të “përndjekjes” dhe “falsifikimit kompjuterik” ndaj dy vajzave, njëra prej të cilave shtetase e mitur.
“Sektori për Hetimin e Krimeve Kibernetike ka administruar kallëzim nga një shtetase, banuese në qytetin e Tiranës, se në mënyrë të vazhdueshme është përndjekur në rrjete të ndryshme sociale, së bashku me motrën e saj të mitur, nga adresa të dyshuara të falsifikuara, nga një shtetas i paidentifikuar“, njoftoi Policia e Shtetit.
Sipas policisë, e mitura 13 vjeçare është larguar nga banesa si rezultat i presionit të ushtruar nga këto profile të falsifikuara nga autori.
Lidhur me rastin në fjalë, policia raporton se 13 vjeçarja u gjet dhe u dërgua pranë familjes.
“Është bërë e mundur gjetja e vajzës së mitur e cila është në gjendje të mirë shëndetësore dhe aktualisht ndodhet pranë familjes së saj”, njoftoi policia.
Drejtuesi i Drejtorisë Vendore të Policisë Tiranë, Tonin Vocaj, raportoi se së fundmi janë evidentuar dhe goditur disa raste të tjera të ngjashme të veprave penale në fushën e krimeve kibernetike, të lidhura me vepra penale si “Shantazhi”, “Përndjekja”, “Falsifikimi kompjuterik”, e të tjera.
Vocaj u bëri thirrje të gjithë përdoruesve të rrjeteve sociale të administrojnë në privatësi maksimale kredencialet e llogarive të tyre dhe të mos shpërndajnë kurrsesi të dhëna personale në burime interneti të pasigurta.
