Këshilli i Lartë i Prokurorisë, KLP u mblodh me urgjencë të premten më 16 gusht për të shqyrtuar një ankesë të kryer nga prokurorja e Sarandës, Besiana Sadikaj kundër vendimarrjes së eprorit të saj, drejtuesit Kledian Llaho, i cili e ka zëvendësuar nga hetimi i një çështjeje pa pëlqimin e saj.
Vendimmarrja e drejtuesit të Prokurorisë së Sarandës, Kledian Llaho e datës 8 gusht për zëvendësimin e Sadikajt, është bazuar mbi një kërkesë të një oficereje të policisë gjyqësore, e cila është pyetur në cilësinë e personit që ka dijeni mbi faktet, në çështjen që po hetohej nga ankuesja.
Llaho ka vlerësuar se Sadikaj gjendjej në kushtet e njëanshmërisë në hetimin e kësaj çështje dhe ka vendosur ta zëvendësojë, ndërsa prokurorja Sadikaj e ka vlerësuar të paligjshëm, të apargumentuar dhe arbitrar vendimin e eprorit, duke kërkuar shfuqizimin e tij në KLP.
Prokurorja ankuese, Besiana Sadikaj ka parashtruar se ka qenë duke hetuar një procedim për veprat penale “Shpërdorimi i detyrës” dhe “Kryerja e veprimeve arbitrare”, të regjistruar pa autor, bazuar në kallëzimin penal të një avokati ndaj autoriteve të Komisariatit të Policisë Sarandë, i cili ka pretenduar se është mbajtur i shoqëruar në kundërshtim me ligjin.
Sadikaj ka sqaruar se ajo është caktuar si prokurore e kësaj çështjeje vetëm përmes siglimit të drejtuesit. Sipas saj, megjithëse i ka kërkuar verbalisht Llahos që të procedohet me vendim për caktimin e prokurorit në hetimin e materialit kallëzues, ai nuk ka pranuar duke e konsideruar të rregullt mënyrën e caktimit pa iu nënshtruar shortit elektronik dhe pa një vendim.
Në kuadër të veprimeve hetimore për këtë procedim, është pyetur edhe oficerja Noreta Kalcuni, si person në dijeni për ngjarjen, pasi ajo ka qenë e gatshme dhe ka marrë deklarimin e të shoqëruarit në komisariat.
Sipas ankueses, më datë 29 korrik, drejtuesi i prokurorisë i ka kërkuar informacion se për çfarë vepre penale është regjistruar procedimi, në çfarë cilësie procedurale është pyetur oficerja Kalcuni dhe nga kush, si dhe nëse është përpiluar urdhër për kryerjen e veprimeve hetimore me të cilin është kryer ky veprim hetimor.
Bashkëlidhur kërkesës për informacion, është vendosur në dispozicion një shkresë me të cilën oficerja Kalcuni ka kërkuar përjashtimin e prokurores Besiana Sadikaj nga hetimi.
Bazuar në kërkesën e oficeres së policisë gjyqësore, drejtuesi Kledian Llaho ka vendosur zëvendësimin e prokurores Sadikaj nga hetimi. Ai ka argumentuar se mes oficeres Kalcuni dhe prokurores Besiana Sadikaj rezulton një marrëdhënie personale konfliktuale, që vlerëson se përbën shkak për vendosjen e prokurores së çështjes në kushte njëanshmërie.
Gjatë një bisede telefonike, drejtuesi i Prokurorisë së Sarandës, Kledian Llaho i tha BIRN se e kishte zëvendësuar prokuroren Sadikaj pasi mes saj dhe oficeres së policisë gjyqësore kishte pasur konflikte. Llaho tha se drejtuesi ka si detyrë që të sigurojë hetime objektive e të paanshme nga ana e prokurorëve.
Në një email drejtuesi i Prokurorisë së Sarandës, Kledian Llaho pretendoi se prokurorja Besjana Sadikaj ishte konfliktuale me kolegët, hetuesit dhe policinë.
“Prokurorja B.S është vazhdimisht konfliktuale me të gjithë kolektivin e kësaj zyre Prokurorie, krijon vazhdimisht situata konfliktesh me të gjithë, përfshire edhe policinë gjyqësore të Komisariatit të Policisë, ndaj dhe për këtë arsye edhe konflikti i radhës imponoi Drejtuesin në vendimmarrjen e tij bazuar në nenet 43 gërma “d” dhe 49.1, 49.3 të ligjit nr. 97/2016 “Për organizimin dhe funksionimin e Prokurorisë në Republikën e Shqipërisë” dhe nenin 27.1 të K.Pr.Penale,” shkruhet në email e Llahos.*
Prokurorja Besiana Sadikaj ishte e paaritshme për t’u pyetur për koment.
Në ankesën e saj, Sadikaj ka pretenduar se arsyetimi drejtuesit është i paargumentuar në fakte konkrete, si dhe cënon pavarësinë e prokurorit, duke u përpjekur për caktimin e subjekteve ku duhet vepruar apo mosvepruar, si dhe duke vendosur në mënyrë arbitrate e të menjëhershme zëvendësimin e prokurorit.
Në shqyrtim të ankesës, KLP vëren se oficerja e policisë gjyqësore deri në momentin e kryerjes së kërkesës për zëvendësimin e prokurores Sadikaj, ka qenë në cilësinë e dëshmitares dhe për rrjedhojë nuk mund të konsiderohet si palë në çështjen që po hetohej.
Për rrjedhojë, konsiderohet se vetëm ankesa e oficeres për përjashtimin e prokurores, nuk mund të përbëjë apriori shkak për zëvendësimin e saj në hetimin e çështjes në fjalë. Sipas KLP, pretendimet për paanshmëri personale të prokurorit në hetimin e një çështjeje duhet të provohen, ose të bazohen në fakte të vërtetueshme. Po ashtu, KLP sjell në vëmendje jurispudencën e Gjykatës Kushtetuese, ku thuhet se paanshmëria personale e gjyqtarit duhet të prezumohet deri sa të provohet e kundërta.
KLP vlerësoi se vendimi për zëvendësimin e prokurores Besiana Sadikaj nuk është marrë në përputhje me ligjin dhe se ankesa e saj gjendet e bazuar në ligj. Në përfundim, këshilli vendosi me votat e tetë anëtarve që morën pjesë në mbledhjen online, pranimin e ankesës së Sadikajt dhe shfuqizimin e vendimit të drejtuesit Kledian Llaho, të marrë prej tij më datë 8 gusht.
Ps * Pas botimit të këtij shkrimi prokurori Kledian Llaho solli me email parashtrimet e tij në lidhje me ankesën e prokurores Besjana Sadikaj në KLP. Për të lexuar parashtrimet e plota të prokurorit kliko këtu.
