Ish-kryebashkiaku socialist i Lushnjes, Fatos Tushe u deklarua fajtor të mërkurën më 9 tetor për fshehje pasurie. Tushe, i cili u dënua në vitin 2022 nën akuzën e shpërdorimit të detyrës, u përball sërish në gjykatë në muajin korrik me akuzën e ngritur nga Prokuroria e Posaçme kundër Korrupsionit dhe Krimit të Organizuar, SPAK, për veprën penale “Refuzimi për deklarimin, mosdeklarimi, fshehja ose deklarimi i rremë i pasurive…,” në formën e fshehjes dhe të deklarimit të rremë,
Sipas kërkesës për gjykim që SPAK depozitoi në gjykatë, Tushe disponon “de facto” një apartament në Lungomare të Vlorës me sipërfaqe 82.33 m2, për të cilin nuk ka deklaruar shpenzimet për blerjen, për punime dhe mobilimin. Po ashtu, nuk ka deklaruar blerjen e dy automjeteve në vitin 2021 dhe një borxh të marrë sipas një deklarate noteriale të 2020-ës.
Në njoftimin e gjykatës thuhet se shqyrtimi i kësaj çështje u zhvillua me rregullat e gjykimit të shkurtuar, prej nga Tushe përfitoi 1/3-ën e uljes së dënimit. Gjyqtarja Flojera Davidhi ka vendosur dënimin e ish-kryebashkiakut Tushe me 1 vit e 6 muaj burgim, ku në aplikim të gjykimit të shkurtuar është caktuar përfundimisht masa e dënimit me 1 vit burg. Davidhi ka vendosur edhe pezullimin e ekzekutimit të vendimit me burgim, duke e vendosur në provë për dy vjet, me kusht që të mos kryejë vepër tjetër penale.
Gjykata e vendosur edhe konfiskimin e apartamentit në Vlorë dhe kalimin e kësaj pasurie në favor të shtetit. Tushe u arrestua në vitin 2021, në një nga operacionet më të hershme të SPAK, pasi hetimet e kryera përmes përgjimeve dhe analizimit të dokumenteve zbuluan një skemë të manipulimit të tenderëve dhe vjedhjes së karburantit të blerë për përdorim të bashkisë. Gjatë procesit gjyqësor, Tushe doli i pafajshëm për akuzën e korrupsionit dhe u dënua me 2 vjet e 4 muaj për abuzim me detyrën. Ai përfundoi dënimin dhe u lirua nga burgu në janar 2023.
Tushe ka qenë kryebashkiak jetëgjatë i Bashkisë Lushnje nga viti 2007 deri në vitin 2009 dhe nga viti 2011 deri në vitin 2021 kur u shkarkua për shkak se u arrestua nga SPAK. Ai ka qenë deputet socialist mes viteve 2009 dhe 2011.
