Kryetari i grupit parlamentar të Partisë Demokratike, Gazment Bardhi, dorëzoi para disa ditësh në Prokurorinë e Posaçme një denoncim për mesazhe intimiduese në drejtim të tij nga një llogari anonime. Ai pretendoi se mesazhet kishin në brendësi dokumente të falsifikuara si dokumente të prodhuara nga kjo prokurori.
Pretendimi i Bardhit është konfirmuar të mërkurën edhe nga Prokuroria e Posaçme kundër Korrupsionit dhe Krimit të Organizuar (SPAK) e cila njoftoi se “nga verifikimet e deritanishme të Prokurorisë së Posaçme, mesazhet e pretenduara se rrjedhin nga transkripte bisedash të kryera nëpërmjet SKY/ECC janë manipuluar duke sajuar biseda të pavërteta për individë dhe veprime të kundërligjshme”.
Prokuroria e Posaçme, thotë më tej se “po monitoron nga afër këtë situatë dhe ka nisur verifikimet për të identifikuar burimet e këtyre mesazheve me qëllim ndjekjen penale të autorëve”.
Po ashtu, SPAK bën thirrje aktorëve publikë që të tregojnë kujdes kur ndërveprojnë me mesazhe të kësaj natyre dhe të shmangin shpërndarjen e materialeve të paverifikuara. Bardhi e denoncoi rastin në SPAK duke dorëzuar një dokument të noterizuar për mesazhet e ardhura përmes aplikacionit “Signal”.
Sipas këtij dokumenti në numrin e tij kishte mbërritur një tekst me përmbajtjen “të jesh mir” dhe emrate dy ekspontentë të botës së krimit, Ervis Martinaj dhe Erigers Mihasi, njëri i zhdukur dhe tjetri i vrarë.
Mesazhi kishte dhe një dokument bashkëlidhur që pretendohej të ishte një tabulat përgjimi i firmosur nga oficerë të Policisë Gjyqësore, ku pretendohej për implikim të Bardhit në biseda me eksponentë të botës së krimit. Bardhi kërkoi që SPAK të identifikojë autorin e mesazheve, motivet e këtij kërcënimi dhe arsyet e prodhimit të një dokumenti të falsifikuar si shantazh ndaj tij.
Ai po ashtu pretendoi se shantazhi lidhej me rolin e tij si deputet dhe denoncimet e bëra në parlament për lidhjet mes funksionarëve të lartë publikë dhe krimit të organizuar.
