Gjykata e Posaçme e Shkallës së Parë për Korrupsionin dhe Krimin e Organizuar njoftoi të mërkurën lirimin nga sekuestro të pesë pasurive të paluajtshme të sekuestruara me kërkesë të Prokurorisë së Posaçme në kuadër të hetimit pasuror ndaj ish-shefit të Drejtorisë së Forcës Operacionale, Oltian Bistri, i arrestuar më herët nën akuzën e pjesëmarrjes në një organizatë kriminale.
Sipas koordinatores për të drejtën e informimit, procesi është inicuar nga një shoqëri ndërtimi, e cila ka pasur marrëdhënie kontraktore me Oltian Bistrin dhe familjarët e tij, por ka pretenduar në gjykatë se kontratat janë revokuar.
“Shoqëria ka kërkuar që të hiqet sekuestroja e vendosur mbi këto pasuri dhe shumat respektive monetare (që u depozituan nga ana e shoqërisë) të mbeten të sekuestruara. Pra në thelb, për 5 nga pasuritë objekt sekuestrimi, u bë konvertimi i tyre në vlerën monetare,” sqaroi Lita dhe shtoi se nisur nga fakti se palët kanë revokuar kontratat e sipërmarrjes, nuk ka ndonjë titull mbi këto prona për Bistrin dhe familjarët e tij.
Sipas koordinatores së Gjykatës, edhe pse Bistri i kishte porositur pasuritë dhe kishte paguar shumat përkatëse, i kishte revokuar kontratat. Në këto kushte, shoqëria e ndërtimit ka kërkuar heqjen e sekuestrove mbi pasuritë në këmbim të vlerave monetare.
Ish-shefi i Forcës Operacionale, Oltion Bistri u arrestua në korrik të vitit që shkoi gjatë operacionit të njohur si “Metamorfoza”, me akuzën e përfshirjes në veprimtari kriminale.
Pas arrestimit, SPAK sekuestroi një listë të gjatë pasurish, përfshi 22 njësi(dyqane/ambiente biznesi); 10 apartamente; 1 vilë në rezidencën “Green Valley”, 200 metra truall në kryeqytet, një garazh dhe një makinë. Vlera totale e blerjes së pasurive të sekuestruara sipas çmimeve të përcaktuara në kontratat noteriale është rreth 3 milionë euro.
Oltian Bistri u arrestua së bashku me biznesmenin Pëllumb Gjoka, i cili ka fituar dhe statusin e investitorit strategjik nga qeveria “Rama”, ish-zyrtarin tjetër të policisë Ardit Hasanbega dhe prokurorin e Kukësit, Xhevahir Lita. Në të njëjtin operacion, i cili u zbatua me bashkëpunim nga Europol, Eurojust, Autoritetet Gjyqësore Franceze dhe agjencitë ligjzbatuese belge, holandeze dhe franceze u arrestuan edhe 13 persona të tjerë.
Anëtarët e grupit akuzohen për 12 vepra penale, mes të cilave vrasje, heqje e paligjshme e lirisë, trafikim narkotikësh, pastrim parash, të kryera në kuadër të grupit të strukturuar kriminal. Ndërsa zyrtarët e arrestuar akuzohen për korrupsion, shpërdorim detyre dhe ekspertime të rreme.
