Prokuroria e Durrësit njoftoi të martën më 15 tetor caktimin e masës së sigurimit “Arrest me burg” për katër biznesmenë të zonës së Fushë-Krujës, pasi akuzohen se krijuan një skemë mashtrimi me Tatimin mbi Vlerën e Shtuar, TVSH, duke i shkaktuar shtetit një dëm mbi 1.2 milion euro. Sipas prokurorisë, në këtë skemë mashtrimi me TVSH janë përfshirë të paktën gjashtë subjekte që operojnë në fushën e ndërtimit.
Nga hetimet janë ngritur dyshimet se dy kompani kanë deklarur vlera shitjesh fiktive, që u janë faturur dy subjekteve që operojnë në fushën e ndërtimit. “Nga analizimi i të dhënave të deklaruara si shitjet totale për çdo subjekt, është kryer llogaritja e tatimit mbi vlerën e shtuar si dhe Tatimi Fitimi për çdo subjekti, dhe ka rezultuar në total një dëm i shkaktuar ndaj shtetit në vlerën 127,551,874 lekë”, citohet në njoftim.
Gjykata e Durrësit ka pranuar kërkesën e organit të akuzës për caktimin e masës “Arrest me burg” për katër shtetas të cilët drejtojnë bizneset me adresë në Fushë-Krujë, ndërsa ka kërkuar “Arrest në shtëpi” dhe “Detyrim paraqitje” për tre të tjerë.
Në njoftim konstatohet se shoqëria “3DC” kishte në pronësi vetëm automjete luksoze si, Mercedes Benz AMG 63, Mercedes Benz AMG GT 43, Porsche Cayenne, Land Rover apo BMW X5, ndërkohë që asnjë prej këtyre mjeteve nuk përdoret për aktivitetin e ndërtimit.
Sipas përshkrimit të objektit të aktivitetit të kësaj shoqërie të regjistrur në korrik të vitit 2022, ajo operon në ndërtimin e rrugëve dhe autostradave, mbikalimeve, hekurudhave, tramvaj, metro, pista aeroportuale, ura, diga dhe tunele hidroteknike, ndërtime detare dhe punime thellimi në uje, punime dhe mbrojtje lumore, sisteme hidraulike dhe bonifikime.
