Gjykata e Tiranës deklaroi të enjten fajtor ish-sekretarin e Përgjithshëm të Ministrisë së Financave, Arlind Gjokutaj, i marrë i pandehur për akuzën e shpërdorimit të detyrës.
Gjykata pranoi kërkesën e prokurorit Ndini Tavani për shpalljen fajtor të Gjokutajt dhe dënimin e tij me dy vjet burg, por gjithashtu vendosi që ta pezullojë masën e dënimit dhe ta lërë të pandehurit në shërbim prove për një periudhë 2-vjeçare.
Arlind Gjokutaj u emërua si sekretar i përgjithshëm i Ministrisë së Financave dhe Ekonomisë në tetor të 2021. Më herët, ai ka mbajtur postin e drejtorit të Doganave, ka qenë pjesë e Njësisë Speciale të Antikorrupsionit si edhe te Drejtoria e Parandalimit të Pastrimit të Parave.
Gjokutaj u akuzua fillimisht për shpërdorim detyre në bashkëpunim me kreun e shërbimeve mbështetëse, Fatmir Hoxha dhe një përmbarues gjyqësor, Alban Ruli për një skemë vjedhjeje me një dëm prej 145.8 milionë lekësh në buxhetin e shtetit. Sipas njoftimit paraprak të Prokurorisë, këta shtetas pranuar shpërblimin e shtetasit Ilir Thana në vlerën e 145.8 milionë lekëve, nga të cilat 50 milionë kanë kaluar në llogarinë e tij, duke e trajtuar si pronar të një objekti, pa qenë në këtë status; si dhe duke ekzekutuar për herë të dytë në favor të këtij shtetasi një vendim gjyqësor të ekzekutuar nga Ministria e Financave në vitin 2015.
Hetimi filloi bazuar në një kallëzim të në banke të nivelit të dytë lidhur me një kredi të pashlyer, prej nga u zbulua se Thana u shpërblye dy herë për një pronë të blerë në vitin 1992, që iu kthye ish-pronarit disa vjet më vonë. Ilir Thana, nëpërmjet një vendimi gjykate arriti të marrë paratë e shpenzuara për blerjen e magazinës, sipas indeksit të çmimeve.
Nga hetimi ka rezultuar se Thana ka blerë në vitin 1992 për çmimn 103 mijë lekë një objekt + truall nga Drejtoria e Shërbimit Qeveritar dhe A.K e Privatizimit, por në vijim pas një procesi gjyqësor civil, Gjykata e Apelit Tiranë ka vendosur kthimin e palëve në gjendjen e mëparshme. Gjykata ka vendosur që Thanës t’i kthehet vlera e objekteve të blera, e konvertuar me indeksin e rritjes së çmimeve në kohën e ekzekutimit të vendimit.
Nga hetimet ka rezultuar se Thana nuk është mjaftuar me kaq, por ka kërkuar të shpërblehet në cilësinë e ish-pronarit të magazinës dhe truallit, megjithëse nuk e ka pasur asnjëherë këtë status. Ai i është drejtuar në vijim një zyre përmbarimore e cila e ka vlerësuar magazinën në vlerën rreth 70 milionë lekë, por pa arritur ta realizojë ekzekutimin. Edhe një tjetër përmbarues gjyqësor që ka kryer vlerësimin e objektit në masën 82 milionë lekë nuk ka mundur ta ekzekutojë, ndërsa përmbaruesi i tretë e ka vlerësuar 145.8 milionë lekë dhe ka filluar ekzekutimin e kësaj vlere në favor të Thanës, në cilësinë e ish-pronarit të pasurive.
Prokuroria bëri me dije pas procedimit të Gjokutajt, se kur ky i fundit kishte nënshkruar urdhërin e xhirimit të vlerës së kërkuar nga përmbaruesi i tretë, edhe pse një zyrtare e Ministrisë së Financave i ka drejtuar një memo duke i dhënë dijeni mbi faktin se vendimi i formës së prerë i Apelit Tiranë ishte ezkekutuar në vitin 2015 dhe se shuma 145.8 milionë lekë nuk mund të paguhej në favor të Thanës.
