Përfaqësuesit e opozitës e konsideruan një “sulm politik dhe terrorist” arrestimin e ish-presidentit Ilir Meta, aktualisht kryetar i Partisë së Lirë.
Meta, i cili ka mbajtur po ashtu detyrën e kryeministrit, kryetarit të Kuvendit dhe detyra të tjera ekzekutive në karrierën e tij politike 30-vjeçare, u arrestua në mesditë me vendim të Strukturës së Posaçme Antikorrupsion. Ai akuzohet për veprat penale të korrupsionit pasiv, pastrimit të parave si dhe deklarimit të rremë të pasurisë.
Nën hetim për të njëjtat akuza janë edhe Monika Kryemadhi, e cila ka masën e sigurisë “detyrim për paraqitje” para oficerëve të Policisë Gjyqësore; ish-zyrtari Pirro Xhixho i akuzuar për korrupsion pasiv, në masën e “arrestit shtëpiak” si dhe Ema Çoku, e akuzuar për pastrim të produkteve të veprës penale.
Sekretari i Përgjithshëm i Partisë së Lirisë, Tedi Blushi e konsideroi arrestimin e Metës “një akt të mirëfilltë terrorist” dhe akuzoi kreun e Prokurorisë së Posaçme se po përdoret nga kryeministri Edi Rama “për asgjësimin e opozitës, pluralizmit politik dhe demokracisë”.
Pas arrestimit reagoi edhe kryetari i Partisë Demokratike, ish-kryeministri Sali Berisha, i cili po ashtu ndodhet në arrest shtëpie nën hetim për korrupsion.
“Persekutimi i Ilir Metës është politik, politik dhe vetëm politik,” tha Berisha në një deklaratë të shpërndarë për mediat nga zyra e tij e shtypit.
“Nuk kanë publikuar asnjë fakt, asnjë dokument, por kanë zbatuar urdhrat e Edi Ramës, i cili është përpjekur me të gjitha mënyrat për eliminimin politik, e ndoshta edhe fizik të Ilir Metës,” shtoi më tej Berisha.
Eksponentë të tjerë të kësaj partie po ashtu kanë dënuan arrestimin e aleatit të tyre politik si një tentativë për të eleminuar opozitën.
Një sulm i drejtësisë ndaj opozitës e cilësoi arrestimin e Metës edhe deputetja Monika Kryemadhi, bashkëshortja dhe bashkëpunëtorja e tij në politikë prej 3 dekadash me të cilën ka nisur një proces divorci vetëm pak kohë më parë.
“Unë ende nuk kam marrë dijeni mbi një vendim gjykate që do të vendoste masa sigurie mbi mua apo babain e fëmijëve të mi,” tha Kryemadhi në një reagim direkt pas bërjes publik të lajmit të arrestimit, ndërsa shtoi se “persekutimi nga drejtësia si armë ndaj kundërshtarit politik, si dhe gjyqi publik që po na bëhet, nuk ndalon opozitën në betejat pa kompromis për të mbrojtur interesin publik”.
Një reagim i papritur ishte i ai i ish-ambasadores së Bashkimit Europian në Tiranë, Romana Vlahutin e cila shërbeu në Shqipëri gjatë periudhës kur u miratua Reforma në Drejtësi.
“Reforma e drejtësisë në të gjithë forcën e saj. Nuk ka të paprekshëm. Kjo është edhe një mësim i madh për këdo që do ligjin dhe rregullin, mos kini frikë. Drejtësia mund të jetë e ngadaltë, por në fund shërbehet,” shkroi Vlahutin në rrjetin social “X.
