Fadil Geci, një ish-luftëtar i Ushtrisë Çlirimtare të Kosovës dhe ish-anëtar i Lidhjes Demokratike të Kosovës, LDK, tha në gjyqin për krime lufte dhe krime kundër njerëzimit të ish-presidentit të Kosovës Hashim Thaçi dhe tre të pandehurve të tjerë me të në Hagë se Thaçi ishte përgjegjës për një komunikatë që denonconte vëllain e tij si bashkëpunëtor.
“E dija që e kishte shkruar Hashim Thaçi; që nga dita që ai e shkroi, e dija. Shkova në shtëpinë e tij dhe kërkova një përgjigje në lidhje me Komunikatën 59. Babai i tij tha se do të merrja një përgjigje brenda një muaji, por nuk e mora kurrë”, tha Geci të martën në Dhomat e Specializuara të Kosovës.
Komunikata 59 e UÇK-së u botua në fund të tetorit 1998 në gazetën Bota e Re, duke përmendur vëllain e dëshmitarit, Gani Geci, dhe të tjerë si bashkëpunëtorë të policisë serbe kundër shqiptarëve etnikë në Kosovë.
Dëshmitari shpjegoi se dyshohej se vëllai i tij kishte qëlluar në një pjesëtar tjetër të UÇK-së, Abedin Rexhën, por mjekësia ligjore dëshmoi se Rexha nuk kishte vdekur si pasojë.
Avokati i Thaçit, Luka Misetic, tha se Thaçi mohon përfshirjen në komunikatë.
Sipas aktakuzës, Thaçi dhe tre të pandehurit e tjerë bashkë me të, si anëtarë të një ndërmarrjeje të përbashkët kriminale, “ndanë qëllimin e përbashkët për të fituar dhe ushtruar kontroll mbi të gjithë Kosovën duke përfshirë kanosjen e paligjshme, keqtrajtimin, kryerjen e dhunës ndaj dhe largimin e atyre që konsideroheshin si kundërshtarë”.
Kundërshtarët përfshinin njerëz që ishin bashkëpunëtorë ose që perceptoheshin si bashkëpunëtorë me forcat jugosllave ose autoritetet serbe, ose që nuk mbështesnin qëllimet e UÇK-së, ku përfshiheshin edhe anëtarë të LDK-së, serbët, romët dhe grupe të tjera etnike.
Aktakuza pretendon se Thaçi dhe tre të pandehurit e tjerë përdorën metoda të ndryshme për të “ngjallur frikë, mosbesim dhe urrejtje ndaj kundërshtarëve” – duke përfshirë “komunikata, deklarata publike dhe media të tjera”.
Njëra prej këtyre komunikatave dyshohet se ishte Komunikata 59. Dëshmitari tha se vëllai i tij ishte informuar për rolin e Thaçit në Komunikatën 59 nga një gazetar i njohur, Milaim Zeka, në vitin 2017. Ai dëgjoi përsëri se Thaçi e hartoi dhe e lëshoi komunikatën kur i bashkëpandehuri i Thaçit, Rexhep Selimi, foli për këtë në transmetuesin kosovar TV Dukagjini në vitin 2019.
Por Misetic argumentoi në gjykatë se informacioni vinte nga rivalët politikë të Thaçit, duke e forcuar argumentin e tij duke treguar artikuj në media të asaj kohe.
Geci tha para Dhomave të Specializuara se për shkak të komunikatës, dy shokë të tij u vranë dhe vëllezërit e tij u plagosën.
“Dy nga shokët e mi më të dashur u vranë për shkak të asaj komunikate. Dy nga vëllezërit e mi u plagosën. I gjithë lidershipi i Kosovës (udhëheqësit e LDK-së që zgjodhën rezistencën paqësore kundër regjimit serb) u akuzuan duke përdorur komunikata të tilla dhe shumica u vranë. Kjo është e vërteta”, tha ai.
“Kam gjashtë shokë të vrarë, aleatët e mi më të ngushtë, vetëm sepse ishin në LDK”, shtoi ai.
Avokati i Thaçit, Misetic, tregoi një artikull duke cituar ndjesën e klientit të tij për Komunikatën 59 dhe duke mohuar se ai ishte qëndrim i UÇK-së.
Në përpjekje për të vërtetuar marrëdhëniet e mira të Thaçit me vëllain e dëshmitarit, Misetic citoi gjithashtu një artikull të BIRN të vitit 2009, në të cilin Gani Geci akuzonte disa deputetë, kryesisht të LDK-së, se kishin urdhëruar vrasjen e kolegëve të tyre. Por Geci e përjashtonte Thaçin, i cili ishte kryeministër në atë kohë, nga akuzat.
Thaçi, Jakup Krasniqi, Rexhep Selimi dhe Kadri Veseli akuzohen se kanë përgjegjësi individuale dhe komanduese për krimet e kryera ndaj të burgosurve të mbajtur në burgjet e UÇK-së në Kosovë dhe Shqipëri, përfshirë 102 vrasje.
Krimet supozohet se janë kryer ndërmjet të paktën marsit 1998 dhe shtatorit 1999, gjatë dhe menjëherë pas luftës në Kosovë me forcat serbe. Të pandehurit janë vetëdeklaruar të pafajshëm.
