Ish-ndihmësi ligjor i Gjykatës së Lartë Periand Teta u konfirmua nga Komisioni i Pavarur i Kualifikimit pas një procesi që fillimisht e konsideroi atë të dorëhequr. Por edhe pas konfirmimit, që u vendos pas ankimit të Komisionerit Publik dhe vendimit të Kolegjit të Posaçëm të Apelimit, çështja duket se do vijojë.
Komisioneri Florian Ballhysa ankimoi të enjten vendimin për konfirmim në detyrë, duke arsyetuar se ai binte ndesh me ligjin. Ballhysa arsyeton se Komisioni i Pavarur i Kualifikimit nuk kishte tagër ta emëronte Tetën si këshilltar në Gjykatën e Lartë, punë prej të cilës ai ishte larguar në vitin 2017.
Ballhysa arsyeton se Kolegji duhet të ndryshojë vendimin e KPK dhe ta caktojë Tetën si gjyqtar ose prokuror, siç përcaktohet në ndryshimet kushtetuese dhe ligji për rivlerësimin
“Referuar nenit 179/b të Kushtetutës, nenit F, të aneksit të Kushtetutës, jurisprudencës së Kolegjit të Posaçëm të Apelimit pranë Gjykatës Kushtetuese, kërkojmë që shkaqet e këtij ankimi të merren në shqyrtim nga ana e Kolegjit të Posaçëm të Apelimit dhe, në zbatim të nenit 66, pika 1, germa “b”, të ligjit nr. 84/2016, të vendosë: – Ndryshimin e vendimit nr. 803, datë 1.10.2024, të Komisionit të Pavarur të Kualifikimit, dhe zbatimin e dispozitave të nenit 58, pika 2, të ligjit nr. 84/2016”, thuhet në ankim. Kjo pjesë e ligjit përcakton se subjektet që i nënshtrohen me dëshirë vetingut, edhe pse ishin ish=ndihmës ligjor, apo ish gjyqtarë e prokurorë, emëroheshin në detyrë si gjyqtar dhe prokuror.
Komisioneri Publik vlerëson se kjo është “e vetmja alternativë ligjore për Komisionin, pas kalimit me sukses të procesit të rivlerësimit”.
Teta iu nënshtrua dy herë hetimit administrativ, fillimisht Komisioni konstatoi se ai dhënë pëlqimin në mënyrë të heshtur për ndërprerjen e kontratës së tij të punës si ndihmës ligjor, duke e ndërprerë procesin e vetingut pa vendim përfundimtar.
Komisionerja Publike, Irena Nino e ankimoi si të pabazuar vendimmarrjen e Komisionit në Kolegjin e Posaçëm të Apelimit, KPA, duke e konsideruar arsyetimin e fakteve dhe rrethanave ligjore jo të qartë dhe të pamjaftueshëm për shmangien e zbatimit të nenit G të aneksit të Kushtetutës, ku përcaktohet se në rastet e dorëheqjeve të subjekteve të rivlerësimit, vendoset dhe sanksioni që u ndalon rikthimin në sistemin e drejtësisë gjatë 15 viteve të ardhshme.
Teta paraqiti apel kundërshtues në KPA, kundër ankimit të Komisioneres Publike dhe kërkoi lënien në fuqi të vendimmarrjes së Komisionit, ose urdhërimin e vijimit të hetimit administrativ ndaj tij. KPA çmoi se Teta kishte dëshmuar në mënyrë të qartë vullnetin e tij për t’iu nënshtruar procesit të vetingut dhe urdhëroi Komisionin për vijimin e procesit kalimtar për këtë subjekt rivlerësimi.
Pas një seancë dëgjimore pa probleme në të tri kriteret e rivlerësimit, Teta u konfirmua në detyrë më 1 tetor nga Komisioni i Pavarur i Kualifikimit, nga trupa e KPK e kryesuar nga Genta Tafa Bungo, me relatore Xhensila Pinen dhe anëtar Roland Ilian.
Por ky vendim është i ankueshëm sipas Komisonerit Publik, që i kërkon KPA ta caktojë Tetën në postin e gjyqtarit ose prokurorit, si të vetmet alternative ligjore.
Periand Teta ka ushtruar funksionin e ndihmësit ligjor në Gjykatën e Lartë, prej shkurtit 2014 deri në korrik të 2017-ës, kur është liruar nga detyra me urdhër të ish-kryetarit të atëhershëm. Urdhri lirimit ka ardhur pasi Teta ka kërkuar të dijë për vijueshmërinë e punës së tij, në kushtet që gjyqtares pranë të cilës punonte si këshilltar, i kishte përfunduar mandati në qershor të vitit 2016.
