Një 48-vjeçar pronar i një subjekti përpunimi inertesh u arrestua nga policia të mërkurën, pasi IKMT konstatoi se ai po nxirrte inerte nga lumi në mënyrë të paligjshme. Policia njoftoi se pas një kontrolli të ushtruar në terren u gjet se kompania e Përparim Kurtit, merrte zhavorr nga lumi në mënyrë të paligjshme.
“Në vijim të veprimeve procedurale për këtë rast u arrestua në flagrancë pronari i këtij subjekti, shtetasi Perparim Kurti 48 vjeç, banues në fshatin Gjorm, Kurbin. Gjithashtu, iu vendos masa administrative 2 000 000 lekë, për veprimtarinë e kundërligjshme në këtë subjekt”, njoftoi policia.
Kurti sipas të dhënave të bëra publike zotëronte një kompani të përpunimit të inerteve, por nuk ishte pajisur me leje për veprimtarinë dhe po e kryente atë në mënyrë të paligjshme. “Nga verifikimet e kryera rezultoi se veprimtaria në këtë subjekt kryhej në kundërshtim me ligjin, sepse përveç se dëmtonte mjedisin, kryhej pa dokumentacionin përkatës, punonjësit ishin të paregjistruar dhe fshiheshin të ardhurat e përfituara”, thuhet në njoftim. Policia po ashtu bëri me dije se bashkë me IKMT-në kishin vendosur edhe bllokimin e tre mjeteve të rënda.
Shfrytëzimi i paligjshëm i Lumit Mat për inerte nga kompani të ndryshme mbetet në një problem mjaft shqetësues, ndërsa masat e pretenduara nga autoritetet kanë dështuar t’i vënë fre fenomenit. Nga marrja e inerteve lumi ka ndryshuar rrjedhë, duke gërryer qindra hektarë tokë bujqësore, si dhe ka shkaktuar dëmtime dy ura përfshirë dhe urën monument kulture të Zogut, e cila ka rënë me disa metra dhe rrezikon seriozisht shembjen totale.
