Shqipëria vijon të jetë target i sulmeve kibernetike nga aktorët që kryen sulmin e vitit 2022 ku u tentua gjithë sistemi i të dhënave shtetërore, sulm që më pas iu atribua shtetit të Iranit.
Pohimin e bëri të mërkurën në Kuvend drejtoresha e Agjencia Kombëtare e Shoqërisë së Informacionit (AKSHI), Mirlinda Karçanaj, e cila përshkroi me detaje sulmin dhe masat e marra gjatë një seancë dëgjimore në komisionin e posaçëm për të luftuar ‘dizinformimin’ dhe ‘ndërhyrjen e huaj’.
“Nuk ja dalim në luftën kundër krimit kibernetik, aq më tepër në luftën ndaj aktorëve që kanë 2 vjet që kanë target Shqipërinë dhe sistemet kibernetike të Shqipërisë nëse jemi vetëm”- e nisi fjalën Karçanaj, duke shtuar se sulmi i dy viteve më parë i gjeti të papërgatitur.
“Ia dolëm të izolonim gjithçka në atë moment dhe sipas dy raporteve që do të flas pak më vonë, vetëm 10 përqind e sistemeve dhe të dhënave u fshinë nga kundërshtarët”- tha ajo.
Karçanaj shtoi se të dhënat e fshira ishin mundur të rikuperoheshin me ndihmën e një skuadre nga Microsoft dhe FBI, të ofruara si mbështetje që në momentin e parë të sulmit nga Ambasada Amerikane.
Ajo shtoi se synimi i 4 skuadrave që sulmuan në të njëjtën kohë ishte fshirja e gjithë të dhënave të shettit, ndaj veprimi i parë që ndërmorri institucioni ishte ulja e të gjitha sistemeve të shtetit për të shmangur pasojat e sulmit.
Por Karçanaj kërkoi fikjen e kamerave të komisionit kur kuptoi që dëshmia e saj ishte duke u transmetuar live për shkak të konfidencialitetit të të dhënave që do të raportonte para deputetëve.
Shqipëria ndërpreu marrëdhëniet diplomatike me Iranin më 7 shtator 2022 dhe dëboi diplomatët e tij, duke fajësuar Republikën Islamike të Iranit për një sulm kibernetik në korrik të vitit të kaluar.
Sulmet kibernetike ekspozuan problemet me sistemet e sigurisë online dhe ruajtjen e të dhënave personale.
Një raport i kompanisë “Microsoft”, e cila u thirr nga qeveria shqiptare për të ndihmuar në zbrapsjen dhe investigimin e sulmit kibernetik ndaj Shqipërisë në korrik të këtij viti, thotë se arriti të gjurmojë 4 grupe sulmuesish të lidhur me shërbimet inteligjente të Iranit.
Raporti përshkruan me detaje infiltrimin në një server të pambrojtur të faqes administrata.al në maj 2021 dhe më pas përshkallëzimin e sulmit deri në korrik 2022, kur sulmuesit tentuan të fshijnë të dhënat në server.
