Një burrë 55 vjeçar nga Përmeti u ndalua nga Policia e Shtetit ditën e martë për mashtrim kompjuterik ndaj 117 personave.
“Me anë të mashtrimit kompjuterik ka përfituar shuma parash me pretendimin për të ndihmuar një të mitur të sëmurë, për kurimin e tij”, shkruan njoftimi i Policisë së Shtetit në faqen zyrtare në Facebook.
Shtetasi në fjalë ka hapur një profil të rremë në rrjetin social Instagram, duke përdorur fotografi të marra në internet nga një shtetas i mitur i sëmurë, dhe ka përfituar shumë parash nga shtetas të ndryshëm që i kanë besuar thirrjes së tij.
“Nga veprimet paraprake janë dokumentuar me prova ligjore 117 transaksione bankare që janë kryer nga shtetas shqiptarë, të cilët janë mashtruar nga profili fals në Instagram “, shkruan policia.
