Më 11 maj 2025, shqiptarët do t’u drejtohen kutive të votimit për zgjedhjet e përgjithshme parlamentare, Pas konsultimit me partitë politike dhe Komisionin Qendror të Zgjedhjeve, presidenti Bajram Begaj vendosi të dekretojë datën e kërkuar nga Partia Socialiste për mbajtjen e zgjedhjeve.
Në njoftimin e shpërndarë për mediat, Presidenca sqaroi se përzgjedhja e kësaj date erdhi për shkak se u kërkua nga Komisioni Qendror i Zgjedhjeve për të pasur më shumë kohë në dispozicion për zbatimin e votën e diasporës.
“Shkaku themelor për caktimin e datës 11 maj 2025 si datë për mbajtjen e këtyre zgjedhjeve qëndron në nevojën e shprehur nga KQZ-ja për të shfrytëzuar të gjithë kohën në dispozicion për përgatitjen e infrastrukturës ligjore dhe organizative, me qëllim që të bëhet i mundur votimi i sukseshëm dhe rezultativ i shqiptarëve nga jashtë vendit,” thuhet në njoftimin e shpërndarë nga Presidenca.
Sa i përket shqetësimit të Partisë Demokratike dhe pjesës tjetër të opozitës se data 11 mund të ndikojë pozitivisht për Partinë Socialiste për shkak se parashikohet që të zhvillohet samiti i 6-të i Komitetit Politik Evropian, Presidenca pranon se ky aktivitet mund të përbëjë ndërhyrje në fushatën zgjedhore.
“Pa vënë në diskutim lejueshmërinë ose jo të një veprimtarie të tillë, sepse kjo është kompetencë ligjore e KQZ-së, Presidenti i Republikës bashkohet në qëndrimin, se zhvillimi nga ana e qeverisë i një takimi të kësaj natyre në finalen e fushatës zgjedhore, me pjesëmarrjen e jashtëzakonshme të lidershipit politik evropian, nuk mund të jetë pa ndikim në caktimin e datës së zgjedhjeve,” thuhet në njoftim.
Por Presidenca sqaron se ka kërkuar informacion për këtë çështje dhe ka kryer të gjitha verifikimet me autoritetet kompetente të Shqipërisë dhe ka marrë zyrtarisht përgjigje se ky samit do të zhvillohet pas datës 11 maj 2025.
“Konfirmimi zyrtar si më sipër heq rezervën e shprehur nga Partia Demokratike dhe nga pjesa tjetër e partive parlamentare ndaj datës 11 maj 2025 dhe e bën këtë datë të pranueshme dhe të pëlqyeshme për të gjithë faktorin politik,” sqaroi më tej Presidenca.
