Disa ditë pas publikimit në media të një qëndrimi të Gjykatës së Lartë, sipas të cilit mandati i kryetares së Gjykatës Kushtetuese mbaron në mars 2025 dhe se data 10 dhjetor ishte data kur Gjykata duhej të deklaronte mbarimin dhe fillimi e procedurës së rinovimit, kryetarja e gjykatës Holta Zaçaj bëri një deklaratë publike dhe njoftoi se do kërkonte interpretimin e Komisionit të Venecias mbi rastin.
Zaçaj tha se ajo do ta mbante mandatin deri në mbërritjen e opinionit të Venecias. “Dëshiroj të garantoj opinion publik se, në cilësinë time si Kryetare e Gjykatës Kushtetuese, do të ushtroj përgjegjësitë e mia për të vënë në lëvizje Gjykatën në përputhje me opinionin e Komisionit të Venecias, i cili, ashtu si edhe kërkesa për amicus curiae, do të bëhet publik”, tha Zaçaj.
Në qëndrimin e saj Zaçaj interpreton se përfundimi i mandatit të anëtarit të Gjykatës Kushtetuese nuk mund të vendoset bazuar në datën e mbarimit të mandatit të gjyqtarit paraardhës. “Data e përfundimit të detyrës së gjyqtarit paraardhës, në rastet kur ai ka përfunduar mandatin e plotë, nuk referohet nga Kushtetuta apo ligji si një ngjarje juridike, e cila përcakton edhe përfundimin e mandatit të gjyqtarit pasues”, thotë ajo. Zaçaj thotë se referuar kohës së zgjedhjes mandati i saj mbaron në fund te vitit 2025.
Sipas Zaçaj çështja ishte e diskutueshme dhe opinoni i Venecias do të ndihmonte edhe në sqarimin e situatave të ngjashme. Ajo po ashtu i tërhoqi tërthorazi vëmendjen Gjykatës së Lartë në lidhje me qëndrimet publike. “Gjej rastin të sjell në vëmendje dhe të kërkoj nga çdo organ tjetër që të respektojë pavarësinë e gjyqtarëve kushtetues, si dhe të vetë Gjykatës Kushtetuese në ushtrimin e kompetencës për deklarimin e mbarimit të mandatit të këtyre gjyqtarëve”, tha ajo.
Kjo nuk është hera e parë që ka debat në lidhje me afatet e mbarimit të mandatit të gjyqtarëve të Gjykatës Kushtetuese, pas reformimit të plotë të gjykatës për shkak të procesit të vetingut dhe vonesave në plotësimin e gjykatës. Më herët një debat i tillë u bë mbi mandatin e gjyqtares Elsa Toksa, e cila dha dorëheqjen gjatë këtij viti.
