Kolegji i Posaçëm i Apelimit, KPA shpalli të enjten më 12 dhjetor vendimin e përfundimit të procesit të rivlerësimit ndaj ish-inspektores së ish-Këshillit të Lartë të Drejtësisë, Sofia Zhilla, pa një vendim përfundimtar, për arsye të daljes së saj në pension. Të njëjtën gjë kërkoi dhe Komisionerja Publike, Irena Nino gjatë parashtrimeve të martën, e cila ndryshe nga shkaqet e ngritura në ankim, tha që të lihej në fuqi vendimmarrja e Komisionit të cilën e kishte kundërshtuar si të pabazuar. Nino konstatoi se Zhilla ka mbushur moshën e pensionit të pleqërisë dhe për rrjedhojë shqyrtimi gjyqësor është bërë i pamundur.
KPK konkludoi më 29 maj me shumicë votash se Zhilla e kishte humbur statusin e subjektit të rivlerësimit për shkak të dorëheqjes së saj. Ndërsa pakica çmoi se nuk e kishte humbur statusin, pasi kishte qenë e emëruar nga kategoria e inspektorëve jomagjistratë; se nuk ka shprehur vullnetin për t’u dorëhequr nga procesi vetingut; si dhe ka shprehur vullnetin të qëndrojë në detyrë nëpërmjet proceseve gjyqësore që ishin ende në shqyrtim në Gjykatën e Lartë.
Komisionerja Irena Nino vërejti në ankimin e dorëzuar në KPA, se Zhilla ishte emëruar në mars 2013 në Këshillin e Lartë të Drejtësisë me një mandat 5-vjeçar dhe në vitin 2018 i është zgjatur mandati i inspektorit deri në krijimin e zyrës së Inspektorit të Lartë të Drejtësisë. Duke qenë në cilësinë e subjektit të rivlerësimit, ajo ka plotësuar deklaratat përkatëse në kuadër të procesit të vetingut.
Me vendim të tetorit të vitit 2019, Këshilli i Lartë Gjyqësor, KLGJ ka deklaruar mospasjen e statusit “Magjistrat” për Zhillën, por kjo vendimmarrje është ankimuar në Gjykatën Administrative të Apelit nga subjekti. Në vitin 2020, Apeli Administrativ e rrëzoi këtë kërkesë dhe Zhilla ju drejtua Gjykatës së Lartë me rekurs.
Nino vlerësoi atëherë se nuk qëndronte arsyetimi përmbyllës i Komisionit se, askujt prej atyre që mund ta kenë humbur statusin e subjektit të rivlerësimit jo për vullnetin e tyre, nuk mund t’i aplikohet ndalimi i parashikuar nga neni G, pika 2 e aneksit të Kushtetutës, që ndalon riemërimin e këtyre subjekteve në sistemin e drejtësisë për 15 vjet.
Megjithatë, bazuar dhe në parashtrimet dhe provat e dorëzuara nga subjekti në Kolegj, që kishte vendosur në dijeni daljen e saj në pension, Nino tha në seancën parardhëse se tashmë ishte bërë i pamundur vijimi shqyrtimit të çështjes së Zhillës.
Kryesuesja e trupit gjykues të Kolegjit, Rezarta Schuetz, tha ndër të tjera gjatë shpalljes së vendimit se edhe Zhilla kishte kërkuar përmbylljen e procesit pa vendim përfundimtar.
Duke ju referuar gjithë historikut të punësimit të Zhillës dhe vendimeve të marra ndaj saj, Kolegji ka vlerësuar se ajo nuk është magjistrate dhe për rrjedhojë del në pension sipas ligjit të përgjithshëm. Sipas Schuetz, rezulton se Zhilla ka aplikuar për pension dhe është pranuar, nga për rrjedhojë nuk është subjekt rivlerësimi e nuk mund të vijojë shqytimi çështjes së saj në KPA. Me shumicë votash, trupi gjykues i Kolegjit vendosi përfundimin e procesit për Sofia Zhillën, pa një vendim përfundimtar.
