Dy oficerë të policisë gjyqësore në Dibër janë proceduar nga Prokuroria e Posacme, SPAK, pasi njëri akuzohet se ka marrë rryshfet në kërmbim të favorizimit të një proceduari, ndërsa tjetri ka shpërdoruar detyrën duke mos kryer hetime ndaj personit nën hetim, megjithë ka qenë në dijeni të komunikimeve me përmbajtje korruptive.
Nëpërmjet një njoftimi të shpërndarë të shtunën më 28 dhjetor, SPAK sqaron se oficeri i Komisariatit të Policisë së Dibër, Shuip Cami, i ka kërkuar dhe i ka marrë shtetasit F.K. shumën prej 3000 euro për të favorizuar pozitën procedurale të shtetasit A.Sh. në çështjen penale kundër tij të regjistruar në vitin 2020. Ndaj Camit, prokuroria ka ngritur akuzën “Korrupsion pasiv i gjyqtarëve, prokurorëve dhe funksionarëve të tjerë të organeve të drejtësisë” dhe është pranuar nga gjykata kërkesa për caktimin e masës së sigurimit personal “Arrest në burg” ndaj tij.
Oficeri pranë Prokurorisë së Dibrës, Aldo Puca akuzohet për shpërdorim detyre, pasi nga hetimet ka rezultuar se ai ka qenë i ngarkuar me hetimin e çështjes ndaj A.Sh., për favorizimin e të cilit kolegu Cami ka marrë 3000 euro. “…me veprimet dhe mosveprimet e tij nuk ka përmbushur në mënyrë të rregullt detyrën ligjore (psh; duke qenë në dijeni të komunikimeve me përmbajtje korruptive, ai nuk ka kryer në kohën e duhur ndonjë veprim për referimin e tyre në prokurorinë përkatëse, por ka vepruar pothuaj dy vite më vonë, vetëm kur viktima e veprës penale e shprehu këtë fakt në Gjykatë, pasi është njohur me aktet, nuk i ka referuar komunikime me interes dhe nuk është kryer identifikimi i personave të dyshuar për kryerjen e akteve korruptive edhe pse komunikimet e bënin të qartë këtë fakt”, vëren SPAK lidhur me qëndrimin e oficerit Puca në këtë çështje. Ndaj tij, është caktuar masa e sigurimit personal “Detyrimi për tu paraqitur në policinë gjyqësore”.
Detyrim paraqitje është caktuar dhe ndaj shtetasit F.K. i cili akuzohet për korrupsion aktiv pasi i ka dhënë oficerit Cami shumën e parave. SPAK bënë më dije se masa e këtij të fundit nuk është arritur të ekzekutohet, ndërsa për dy oficerët e policisë janë zbatuar.
