Një anije me 670 000 litra naftë e dyshuar si e kontrabanduar nga Tunizia është kapur në Portin e Durrësit të hënën ndërsa u deklarua arrestimi i ekuipazhit të saj dhe bllokimi i 14 dokumenteve të identifikimit dhe dokumenteve për lundrim.
Tre persona, një shqiptar dhe dy të huaj u arrestuan, dy të tjerë u shpallën në kërkim ndërsa pesë anëtarë të ekuipazhit do hetohen në gjendje të lirë.
“U arrestuan në flagrancë shtetasi sirian Mohammd Kahilah, 45 vjeç, me detyrë kapiten i anijes, shtetasi shqiptar Eneo Cano , 43 vjeç, me detyrë marinar i anijes, si dhe shtetasi indian Sushil Vema, 42 vjeç, me detyrë oficer i parë i anijes. Gjithashtu, u identifikuan dhe u shpallën në kërkim organizatorët e dyshuar të këtij rasti, shtetasit E. S., 59 vjeç, banues në Durrës, dhe F. B., 29 vjeç, banues në Zvicër”, tha DVP Durrës, në një njoftim për mediat mesditën e së hënës.
Nafta e dyshuar kontrabandë u gjet falë një hetimi dhe bashkëpunimi mes policisë, seksionit të antikontrabandës në Drejtorinë e Doganave dhe zyrës së Guardia di Finanza në Durrës.
Policia bëri me dije se nafta, rreth 670 mijë litra, ishte depozituar në balastrat që shërbejnë për balancimin e anijes. Nafta dyshohet se ishte kontrabanduar nga Tunizia.
