Prokuroria e Posaçme, SPAK, kërkoi deklarimin fajtorë të ish-drejtores së Autoritetit Rrugor Shqiptar, Sonila Qato dhe të disa vartësve të saj, të cilët akuzohen se favorizuan një shoqëri në hije në tenderin 19 milionë euro të tunelit të Skërficës në rrugën Kardhiq-Delvinë në vitin 2019.
Prokurori që përfaqësoi çështjen në gjykatë, Elvin Gokaj, kërkoi dënimin e Qatos me 1 vit burgim për veprën penale “Shkelja e barazisë së pjesëmarrësve në tendera apo ankande publike”. Po ashtu, ai kërkoi që ndaj saj të caktohet nga gjykata dhe dënimi plotësues, për t’i hequr të drejtën për të ushtruar funksione publike. Të njëjtat masa dënimi u kërkuan dhe për të pandehurën Elona Gogo.
Për të pandehurit Simon Prendi dhe Arbër Troka u kërkua dënimi përfundimtar me 2 vjet burgim për secilin. Po ashtu, u kërkua dhe heqja e së drejtës për të mbajtur funksione publike për një periudhë 3-vjeçare. Gokaj kërkoi dënimin e të pandehurit Erdit Salillari me 9 muaj burgim dhe heqjen e të drejtës për të ushtruar funksione publike për 5 vjet; ndaj Admir Pahumit u kërkua 1 vit burgim dhe heqjen e të drejtës për mbajtje të funksioneve publike për 3 vjet; për Nikollaq Mihalin dhe Miranda Shkurtin u kërkua dënimi me nga 8 muaj burg dhe 3 vjet të mos ushtrojnë funksione publike. Për Shkurtin, Prokurori Gokaj kërkoi pezullimin e dënimit dhe vendosjen e saj në shërbim prove për 16 muaj.
ARRSH ngriti grup pune në vitin 2019 për të verifikuar punimet e kryera nga kompania “Gjoka” në tunelet e rrugës së Arbërit, që i ishin dhënë me koncesion nga Ministria e Infrastruktuës dhe Energjisë. Kontrolli erdhi pasi kjo kompani garoi për tenderin 19 milionë euro në rrugën Kardhiq – Delvinë dhe pretendoi se ishte skualifikuar padrejtësisht.
Sipas SPAK, ARRSH inicioi një hetim administrativ për zbatimin e kontratës koncesionare të rrugës së Arbrit, duke prodhuar të dhëna të rreme për të argumentuar skualifikim e kompanisë “Gjoka” nga tenderi. Prokuroria i akuzoi anëtarët e grupit të punës për “Falsifikim të dokumenteve”, me argumentin se kanë përgatitur në të njëjtën ditë dy raporte që ndryshojnë nga përmbajtja.
Sipas SPAK, pas bashkimit të operatorëve të shpallur fitues nga ana e ARRSH, qëndronte në hije kompania e ndërtimit “Vëllezërit Hysa”, e cila në atë periudhë po ndiqej penalisht për abuzime me kontratën e ndërtimit të rrugës së Elbasan-Gjinar.
