Kolegji i Posaçëm i Apelimit, KPA vendosi të enjten më 23 janar, lënien në fuqi të vendimit të Komisionit të Pavarur të Kualifikimit, KPK për shkarkimin nga detyra të gjyqtarit të Gjirokastrës, Guximtar Boçi. Vendimi u mor në mënyrë unanime nga trupi gjykues i Kolegjit i kryesuar nga Natasha Mulaj, me relatore Ina Rama dhe anëtarë Mimoza Tasi, Rezarta Schuetz e Sokol Çomo anëtarë, pas shqyrytimit në dhomë këshillimi të ankimit të Boçit.
Gjyqtari Guximtar Boçi u shkarkua nga detyra më 10 maj 2022, pasi Komisioni i Pavarur i Kualifikimit konkludoi se kishte kryer deklarim të pamjaftueshëm dhe fshehje të pasurisë, si dhe kishte cenuar besimin e publikut në transaksionet e disa pronave.
Guximtar Boçi e nisi karrierën e tij në sistemin e drejtësisë në vitin 1996 dhe punoi si gjyqtar dhe kryetar gjykate në Gjirokastër.
Në vitin 2016, pas publikimit të një audio-regjistrimi sipas të cilit Boçi akuzohej se kërkoi favore seksuale në këmbim të një vendimi gjyqësor, ish-Këshilli i Lartë i Drejtësisë, KLD e shkarkoi atë nga funksionet e kryetarit të gjykatës dhe e pezulloi si gjyqtar.
Në vitin 2017, prokuroria e pushoi procedimin penal ndaj Boçit dhe një vit më vonë ai fitoi pafajësinë me vendim të Gjykatës së Apelit të Vlorës. Boçi kërkoi prej asaj kohe rikthimin në sistemin gjyqësor, por Këshilli i Lartë Gjyqësor i rrëzoi kërkesat e tij.
Audio-regjistrimi nuk u gjet penalizues as prej Komisionit.
