Kolegji i Posaçëm i Apelimit, KPA njoftoi të mërkurën lënien në fuqi të shkarkimit nga detyra të prokurorit të Vlorës, Dritan Marku. Vendimi u mor më 4 shkurt në mënyrë unanime nga trupi gjykues i Kolegjit i kryesuar nga Natasha Mulaj, me relator Sokol Çomo dhe anëtarë Ina Rama, Mimoza Tasi e Rezarta Schuetz, pas shqyrtimit në dhomë këshillimi të ankimit të kryer nga subjekti rivlerësimit.
Dritan Marku u shkarkua nga Komisioni i Pavarur i Kualifikimit më 5 korrik 2021 për probleme të pasurisë dhe cënim të besimit të publikut tek sistemi i drejtësisë. Vendimi i shkarkimit në KPK u mor me shumicë votash, pasi një prej anëtarëve të trupës e konsideroi të padrejtë përfundimin e procesit të rivlerësimit vetëm për një kriter, atë të pasurisë.
Dritan Marku e filloi karrierën në sistemin e drejtësisë si oficer i Policisë Gjyqësore në vitin 2000. Ai ushtroi funksionin e prokurorit në Prokurorinë e Vlorës për gati dy dekada.
