Prokuroria e Tiranës ka dërguar për gjykim shtetasin R.B., i akuzuar për veprën penale ‘Goditje për shkak të detyrës’ në bashkëpunim, sipas nenit 237/1 dhe 25 të Kodit Penal. Viktimë e sulmit është administratori i portalit online ‘Pamfleti’, shtetasi Gjergj Zefi.
Sipas hetimeve të Prokurorisë, në kuadër të procedimit penal nr. 6833, R.B., në bashkëpunim me persona të tjerë ende të paidentifikuar, ka sulmuar fizikisht Gjergj Zefin. Hetimet nisën pas referimit të Komisariatit të Policisë nr. 3, pasi viktima u paraqit në Spitalin e Traumës me lëndime në kokë, krah, buzën e poshtme dhe këmbë, pa e kujtuar qartë rrethanat e ngjarjes.
Pamjet filmike nga zona dhe dëshmia e një banori, i cili pa disa persona teksa godisnin Gjergj Zefin me shkop dhe largoheshin me një makinë të zezë, ndihmuan në identifikimin e automjetit të përdorur nga autorët.
Në përfundim të hetimeve, Prokuroria ka vendosur ta çojë çështjen në gjyq, ndërsa hetimet për personat e tjerë të përfshirë vijojnë. Autoritetet nuk kanë dhënë ende detaje mbi motivet e sulmit apo lidhjen e mundshme të tij me aktivitetin profesional të viktimës.
