Gjykata e Posaçme vendosi të enjten më 27 shkurt deklarimin fajtor të ish-kryetarit të Bashkisë së Pogradecit, Eduart Kapri dhe dy vartësve të tij, të akuzuar se lejuan kryerjen e punimeve në kundërshtim me ligjin në një pallat 14-katësh të kompanisë së themeluar nga vetë Kapri, që administrohet nga vëllai i tij.
Gjykata vendosi ta dënojë Kaprin për veprën penale të “shpërdorimit të detyrës” e kryer në bashkëpunim me 1 vit e 6 muaj burgim, që në aplikim të gjykimit të shkurtuar u reduktua në 1 vit burg. Gjykata vendosi gjithashtu të urdhërojë pezullimin e vendimit me burgim dhe e ka vendosur Kaprin në provë për një afat prej 2 vitesh.
Fajtorë për shpërdorim detyre u deklaruan edhe juristi i Bashkisë Pogradec, Besjan Meço dhe specialistja e Drejtorisë së Planifikimit dhe Zhvillimit të Territorit në këtë njësi vendore, Besmira Niko, të cilët u dënuan me nga 8 muaj burgim. Edhe për këta të pandehur, gjykata vendosi ta pezullojë dënimin dhe i la në shërbim prove për 1 vit e 4 muaj.
Ndaj tre të pandehurve u vendos edhe dënimi plotësues që i ndalon të ushtrojnë funksione publike për 5 vjet.
Hetimi ndaj Kaprit filloi bazuar në aktet e dërguara për kompetencë në SPAK nga Prokuroria pranë Gjykatës së Juridiksionit të Përgjithshëm të Shkallës së Parë Korçë. Sipas SPAK, është dokumentuar fakti penal se me veprimet dhe mosveprimet e tij, Kapri në cilësinë e kryetarit të Bashkisë Pogradec, në bashkëpunim me dy të pandehurit e tjerë, kanë lejuar kryerjen e punimeve në kundërshtim me dispozitat ligjore, të një pallati 14 katësh, nga shoqëria Gedi sh.p.k.. Kjo shoqëri është themeluar në vitin 2005 me ortakë vëllezërit Gëzim dhe Eduart Kapri. Pas zgjedhjes si kryetar i bashkisë së Pogradecit në vitin 2015, Kapri u largua nga kompania.
Kompania Gedi sh.p.k ka marrë një leje për ndërtimin e një kompleksi banimi në vitin 2009, kur administrator ishte vetë ish-kryebashkiaku Eduart Kapri. Bashkia Pogradec ia refuzoi Kaprit zgjatjen e afatit të kësaj leje ndërtimi, për shkak se afati për përfundimin e punimeve ishte data 9 dhjetor 2014 dhe kërkesa e subjektit ndërtues ishte depozituar me shkrim jashtë afateve ligjore.
Në mars të vitit 2016, kur konflikti administrativ mes bashkisë dhe shoqërisë së Kaprit ndodhej ende për gjykim pranë Gjykatës Administrative të Apelit Tiranë, ai tashmë në cilësinë e kryetarit të Bashkisë, lejoi jo vetëm përfundimin e punimeve të pezulluara nga administrata e mëparshme, por edhe ndërtimin e kateve shtesë nga ana e shoqërisë me administrator vëllain e tij, Gëzim Kapri.
