Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 6 mars sekuestrimin e 92 pasurive të paluajtshme e të luajtshme të drejtuesve të organizatës kriminale që kishin rekrutuar dhe katër funksionarë të Policisë së Shtetit, të arrestuar të dielën, me akuzën e bashkëpunimit në trafikun e drogës. Pasuritë e sekuestruara u përkasin drejtuesve të organizatës, të përfshirë gjatë viteve 2019-2021 në veprimtarinë kriminale të kultivimit të bimëve narkotike në zonën e Sarandës dhe rrethinat e saj, si dhe trafikimit të narkotikëve nga Shqipëria për në Greqi. Po ashtu, janë sekuestruar dhe pasuri në emër të personave të lidhur me ta.
Konkretisht, janë sekuestruar 49 pasuri të paluajtshme në bregdet me vlera të mëdha, mes të cilave një hotel; një vilë elitare dhe një vilë standart; nëntë njësi; tre garazhe dhe pesë poste parkimi; katër apartamente; gjashtë ngastra tokë-arë; dy sipërfaqe kullotë; një sipërfaqe pemtore e një truall; si dhe nëntë pasuri të tjera të paluajtshme. Po ashtu, janë sekuestruar 39 llogari bankare, tre shoqëri dhe një automjet.
Sipas SPAK, Drejtoria e Përgjithshme e Policisë së Shtetit dhe Agjencia e Administrimit të Pasurive të Sekuestruara dhe Konfiskuara po vazhdojnë procedurat ligjore për marrjen në dorëzim dhe administrim të pasurive të sekuestruara.
Hetimi i SPAK zbuloi se katër funksionarë të Policisë së Shtetit kishin shfrytëzuar pozicionin e tyre për të ndihmuar drejtuesit e dy grupeve kriminale në zonën e Sarandës e Gjirokastrës, duke u dhënë informacione e këshilla të vazhdueshme për mirëfunksionimin e veprimtarisë kriminale në lidhje me trafikimin e narkotikëve, si dhe u jepinin siguri anëtarëve të tjerë në kryerjen e kësaj veprimtarie të kundërligjshme.
